近排股市升到巴巴聲，大家見面三句唔埋兩句，就講到邊隻股好，邊隻炒得過。股民靠恒指來搵餐晏（當然有啲人餐晏可以好豪），亦都有商家借恒指嚟搵生意，例如做戶外電視廣告嘅JMNetwork囉！
話說呢間公司見到個市咁好，就即刻同恒指服務公司傾合作，由對方供料，JMNetwork就提供戶外播放平台，喺中環、旺角、尖沙嘴同埋北角，播放即時恒生及H股指數，每粒鐘播4次。
睇落好似好小事，但呢招確實對戶外電視好有幫助，因為街上會多咗人留意個大螢幕，即係多咗人睇，咁喺度落廣告，收視率照道理都應該會高啲，咁之後咪就大條道理，可以加廣告費囉。不過華華就有多少擔心，事關外國有研究話，媒體播送股票資訊愈多，個市就愈危！