記得N年前，一向只有直身機的Nokia，終須要屈服，推出其首部摺機7200。剛剛落舖嘅水貨N71，係繼N90之後第2部見街嘅諾記3G摺機，雖然由用料到規格都跟之前嘅直身機N70差不多，之但係玩摺機款嘅N71，勝在內外各有1個鏡頭，玩視像通訊之餘，影自己揀內鏡頭、影街景揀外鏡頭，唔使將部機擰轉面，自拍影人都方便得多！
記者：招佩珊 攝影：黃子偉 模特兒：Lin@Salvador
N71係繼N70之後，另一部見街嘅雙鏡頭3G機，同樣可以直接玩視像通訊，但就改頭換面變為摺機；之前用過部N70，直身機長度短、鍵盤位只得三分一，自拍㩒掣揸唔穩，影相好易鬆郁矇；N71就好在攤開機身，㩒掣影相握得穩部機，更加唔會印到個芒勁多手指模，可算係N70嘅改良版。
影相拍片花臣多
家陣好多Hi-end影相手機都有200萬像素，N71亦不例外，難得佢具備20倍數碼變焦，方便Zoom前Zoom後，加上6種場景模式如風景、肖像、夜景等，還有亮度調校、圖像質素、自拍功能、白光平衡等，影相功能相當不俗。另外，機內屏幕右上角有個30萬像素鏡頭，亦具有2倍數碼變焦效果，玩自拍時影大頭都冇問題啦。
內置均衡器聽歌扮Hi-Fi
N71另一賣點係佢嘅聽歌功能，可以利用WindowsMediaPlayer將手機同PC內嘅歌曲作同步處理；為增強聽歌嘅質感，內置咗好似Hi-Fi嘅Equalizer，鍾意HipHopFeel或R&B等快慢唔同嘅歌，都可校到啱自己喜好為止。之不過，用跟機送嘅耳筒，就唔係點聽得出有太大分別，可能要用到其他質素高啲嘅耳筒先感受到靚聲。
試相區
雖然喺街邊試拍，有晒太陽光，不過頭頂咁啱有簷篷遮住，搞到Model黑晒口面，好彩設有補光燈，令到被攝者臉蛋得以重見天日。
PROFILE
制式：WCDMA/GSM三頻
體積：98.6×51.2×25.8mm
重量：126g
屏幕：26萬色（內）、6萬5色（外）
通話時間：4小時 備用時間：9小時
主要功能：200萬及30萬像素鏡頭、補光燈、20倍數碼變焦、6種場景模式、影片編輯工具、支援miniSD卡、藍芽
售賣點：樂進電訊（23806669）
地址：旺角亞皆老街83號先達廣場G106號舖