「WHATTHE？！唔係嘛？」呢個係噚日孫柏文睇到一段新聞頭條嘅第一個反應。究竟呢段頭條講咗啲乜，令到我有咁大反應？就係話股神畢菲特（WarrenBuffett)，已經將手頭上所有白銀，完全賣出。畀大家一啲背景資料先，話說股神畢菲特當年，由97年至98年間，買咗1億3千萬盎斯白銀，擺入貨倉之內，用嚟炒作，1億3千萬盎斯白銀有幾多？2006年全球白銀生產量，都只係得6億盎斯。咁佢老人家當年買咗嗰堆白銀之後，就令到好多人開始估，佢幾時會放番出市場呢？
點知，喺禮拜六，畢菲特喺佢公司嘅周年大會裏面，話已經將所有白銀賣出。就算作為金手指中堅fan屎嘅你，都一定會問：「孫柏文係好勁，隻金手指係好醒，不過冇理由勁得過畢菲特㗎？佢𠵱家都已經用行動，話你嗰120美元一盎斯白銀目標價係流嘢，孫柏文仲唔要檢討吓對白銀嘅熱誠？」即係問我：「連股神都賣咗喇，你呢個死靚仔仲有膽去叫人買白銀？」
佢都話自己賣早咗
冇錯，畢菲特贏得「股神」呢個美譽，唔係浪得虛名，佢真係好勁。仲有好多鍾意白銀嘅財經口水佬──不論係新晉嘅，定係老樹盤根嘅，都用過「畢菲特都買白銀」呢個理由，去叫人買白銀，惟獨是孫柏文隻金手指冇。冇嘅原因唔係我唔想用呢個理由，只不過孫柏文嘅新晉程度，仲未去到有機會講畀大家知「畢菲特都買咗白銀」，因為實在有太多其他買白銀嘅理由要寫，又因每天篇幅有限，所以我諗住未來有日冇嘢寫，又遇着編輯姐姐趕稿，先至寫出來。
其實，孫柏文未睇完「畢菲特賣晒白銀」段新聞之前，真係對自己建議嘅信心有少少動搖，因為比起畢菲特，我只係一個已經被「邊緣化」、唔識嘢嘅香港人。點知，睇完段新聞之後，我反而冇咁驚慌，因為畢菲特被問到白銀買賣嘅時候，就答：「Iboughtitveryearly,Isolditveryearly.Otherthanthat,itwasperfect.」大約可以繙譯成為：「我好早就買咗，我亦都好早就賣咗。除此之外，就絕對完美啦。」哈、哈！就連股神畢菲特，都覺得自己賣早咗。講真，畢菲特係我偶像，我都想佢搵多啲錢，如果《蘋果日報》早啲叫我用隻金手指，篤爆叫佢賣白銀嘅謬論，你話幾好呢。
有啲錢畢菲特賺唔到
畢菲特今次已經唔係第一次賺少咗錢。聽聞，佢同世界第一首富、微軟主席蓋茲（BillGates)，friend過打band，經常學鄧小平同志去打橋牌，仲要一齊做橋牌拍檔。咁當年微軟主席，差唔多次次見到畢菲特都叫佢買啲科技股，咁畢菲特亦都次次話：「我係唔會買啲我唔清楚嘅嘢，咁我又真係唔識電腦，所以我係唔會買科技股。」後尾，唔知道畢菲特係唔係嫌微軟主席煩，所以最後喺九十年代初，買咗100股微軟同100股英特爾。
出到微軟主席叫買，佢都係唔買，咁你話可以點？淨係微軟隻股票，由93年到今日，即係已經計埋科技股泡沫爆破，都仲升咗9倍。我諗有啲錢，係連畢菲特都賺唔到，要留番畀金手指嘅fan屎賺晒！
孫柏文