公民黨個百人會員名單前排曝光，俾人發現原來有兩個兼職法官都入咗黨，包括高等法院原訟法庭嘅特委法官梁冰濂、同埋區域法院暫委法官區慶祥。吳靄儀話，主席關信基同黨魁余若薇，已經向有關黨員道歉，因為黨員俾人抹黑。
法官入黨睇落好似有啲問題。不過，司法機構就撐公民黨，因為法官唔准入黨嘅指引，主要係針對全職法官，好似特委、暫委呢啲法官例外，因為佢哋正職係做大狀律師。
但唔理乜全職或兼職法官都好，如果當局發現，佢哋審案可能會引致有表面偏頗嘅情況，咁都會自動取消佢哋嘅聆訊資格。
公民黨日前嘅集思營，據聞都有討論黨員名單曝光問題，佢哋最後決定，與其去捉邊個係爆料二五仔，不如諗吓開放啲同透明啲好，反正黨員名單又唔係秘密。咁都算係進步。
傳真︰2623-9278
電郵︰[email protected]