有無試過，發現到一啲好正嘅餐廳，人又唔算太多，唔使等位就食到好嘢，但係隔一排再去，竟然執咗！嗰一下，個心離一離，激進啲嘅仲會若有所失仰天長嘯：「點……解……」唔想再見到咁嘅事發生，惟有盡一點綿力介紹畀多啲人知，等佢哋唔使再拍烏蠅，全情投入整多啲好嘢畀食客。為咗繼續有好嘢食，我情願多啲人去，就算之後要等位又要逼餐死，我都無悔！
記者：馬慶武
攝影：黃子偉、陳偉強
模特兒：Ruby
不斷更新拉麵橫町
03年出現喺銅鑼灣，全盛時期有6間由日本登陸香港的拉麵店，環境裝修扮足日本舊街之餘，仲會耐不耐邀請其他日本拉麵店到港以新換舊。𠵱家餘下4間，八兵衞、膳家、翔太、Gottu，來自東京、京都、北海道等地，最重要係口味夠正宗。
點解拍烏蠅
唔係型人配瀛麵特別好味，只不過附近太多價錢勁平嘅拉麵店。拉麵橫町兩個人嚟食餐麵閒閒哋都要百幾蚊落樓，好多人覺得唔抵。
新招
曾經推出過8折卡，又搵過魔術師駐場希望搞旺場。最新招係保留日本老店之餘請嚟新興麵店，將新口味拉麵帶嚟香港。其中電梯直上嘅膳家係新加入成員，1993年先喺京都開業，唔算老店，所以特別多創新口味。
小記評
雖然唔多人幫襯，但呢度真係好正宗和風口味，最鍾意黑豬角肉拉麵，又肥又香滑。
柚子鹽鴨胸拉麵$54/膳家
創新口味，用上由日本入口，每個賣成40蚊嘅柚子調味，用鴨胸肉做餸，湯底帶少少酸甜味，勁Fresh。
蒜茸Tsuke麵 $48/Gottu
又一新口味，呢碗麵最突破係勁有撈麵感覺，麵上面有一堆炸蒜茸，香辣惹味，夏天天氣咁熱，唔想對住碗出煙熱湯嘅就一定要試試。
擔擔麵 $42/八兵衞
日本人都算鍾意食中華料理，所以八兵衞本店都有源於中國嘅擔擔麵，夠香夠辣，而用上日本拉麵嚟整更加強彈牙口感。
黑豬角肉拉麵$68/翔太
打破一般日本拉麵只用叉燒做餸嘅傳統，用上一隻豬只有兩支嘅顴骨上面嘅肉做餸，感覺上滿足過食一塊塊薄英英嘅叉燒。
拉麵橫町
地址：銅鑼灣謝斐道517號1樓
電話：22956403（翔太）、22956405（膳家）、22956402（八兵衞）、22956400（Gottu）
廣島風味翔太鐵板燒
鐵板燒喺香港唔算好流行，翔太喺銅鑼灣開業唔算好耐，由日本師傅當主廚，環境裝修無一般鐵板燒店咁悶，走潮流路線。
點解拍烏蠅
一來鐵板燒唔係平嘢，價錢平極有個譜。而且翔太係上樓舖，宣傳又唔算多，樓下淨得個招牌寫住翔太鐵板燒，所以好多人都唔知有間咁嘅舖頭。
新招
因為初開業，所以招招都好新。重點推介菜式係廣島燒餅，負責人話外面多數都係大阪燒，好少有人做廣島風味嘅燒餅。主要Sell採用正宗材料傳統製法，仲喺日本請嚟擁有多年經驗嘅師傅，加上各類特色鐵板燒菜式，口味地道。
小記評
嘩！個廣島燒餅，又炒麵又豬肉勁多料，底下仲鋪蛋，正！
正宗廣島燒餅$110
問日本師傅點為之正宗，佢諗咗差唔多10分鐘，答咗兩句：「材料正宗，製法正宗。」唔，不過蛋皮唔厚，餡料中豬肉肥瘦又適中，點好味法？10分鐘後答你！
鮮蘆笋帶子蠔油燒$100
特色在於用上蠔油作調味料，而且帶子新鮮肉彈牙，配合鮮蘆笋不會有太膩感覺。
翔太鐵板燒
地址：銅鑼灣駱克道491-499號京都廣場9樓
電話：28911685
新人事新泰菜友誼泰國菜館
九龍城泰國菜館雲集，仲有大量各國餐廳，友誼唔算喺中心地段，搵食好難搵到咁僻。開業10幾20年嘅友誼，一向賣開傳統泰國菜，大部份調味料都係由泰國直接運嚟香港，而且泰國廚師已經有20幾年整泰菜經驗，靠得住。
點解拍烏蠅
舖面環境畀人殘舊感覺，亦太耐無新菜式推出，價錢亦唔算特別平。而且位處人流較少嘅啟德道，九龍城大大話話有幾廿間泰國菜館，舖面唔顯眼好蝕底。
新招
盡量推出新鮮菜式，除繼續有勁撚手嘅泰國傳統小菜外，𠵱家剛頂手嘅新大廚仲會搞搞新意思，話要設計出有泰國風味但又充滿新鮮口味嘅新派泰國菜。除咗大熱嘅冬蔭功、生蝦刺身之外，𠵱家仲有好多新意菜式，例如用豬手當材料，喺泰國菜嚟講都算新鮮。
小記評
呢度啲泰菜幾OK㗎，新菜豬手好味，傳統冬蔭功仲一流。
檸檬蒸烏頭$118
已經講明要新菜式，但係老闆兼大廚阿恩點都要整呢味傳統泰菜出嚟，因為夠經典又係招牌菜喎。
泰式蠔油豬手$58
老闆自創菜式，用蠔油煮豬手好就好食，但係似中國菜多啲，老闆就話當中加入咗泰國香料一齊煮，食真啲，又的確有少少香辣味喎。
友誼泰國菜館
地址：九龍城啟德道38號地下
電話：23828671