卓，你對我部Corolla耗油量有懷疑，說無可能係$0.8/km，哼！你好嘢，連我這個錯處你都捉到！若然你唔講，都唔知我用錯咗舊嗰個油價去計，正確答案應該係$0.9至$1.0/L左右，真係要同各位講聲Sorry！
不過，我有樣嘢要同你講，就係你說我在路上開車從不讓的士司機，同埋一定要「閘」停佢哋咁滯，我諗你搞錯咗，小弟只會對一些連在路上開車基本禮貌也沒有嘅的士司機下手，例如你坐我順風車那天，那位的士司機一點信息也沒有，便在離我車不遠的右方切入我的行車線，響號示警有錯嗎？另當時若果急煞的話，尾隨的客貨車跟巴士便會撞上來，你教我怎麼辦吖！
坦白講，香港嘅的士司機大都奉公守法，但某些堪稱「路渣」嘅害群之馬，完全不理會其他道路使用者嘅安全，當正條路係自己嘅，燈又唔打就Cut線、話停車就停車、阻住路口一於話之你、無客慢車遊街，有客就舒密加上身，見車就推等等，難道佢哋又啱咩？我明白大家都係搵兩餐，但點解任何事情都變得順理成章，唔可以奉公守法去做生意嘅咩？例如政府畀張Permit你喺禁區上落客，你家陣就連24小時禁區都停喺度等客，阻住條路，明知後面塞晒車都唔理，有無搞錯！你自己去中環或者葵芳睇吓吖！不過你話我無品，嗰次你推住架巴士上將軍澳隧道咪仲無品！
記者：鄭達基