地產商劈價促銷貨尾，但港股仍然牛氣沖天，再升287點，收17301，其中劈價主角之一的新地（016）更升2.31%至92.90元。
芬佬話，新地劈價唔代表樓市會再陷調整局面，只是新地想集中資源增加在內地的投資，新地唔單止賣貨尾，仲會透過分拆REITs減持非核心物業的權益，大約可套現31億元。
DBA想低調唔得
新股熱潮持續，散戶連低調上市的DBA電訊（3335）都唔放過。該股今次招股總數2.5億股，公開發售2500萬股，結果錄得292倍超額認購，其中不乏認購1手博抽中的散戶。
有消息話，此股原本諗住低調上市，希望多啲貨落入芬佬手上，上市後可以大幅挾高。點知散戶熱情不減，超購逾290倍，令到芬佬要與散戶對分2.5億股，各取1.25億股，打散DBA的貨源，要歸邊非動用更多銀彈不可。DBA電訊招股PE8.9倍，比起同類股威勝儀表（3393）16倍PE平一大截，照計可以吸引芬佬在二手市場追貨，將股價托高。
本港最大價股宏利金融（945）玩拆細，以送紅股方式變相1拆2，消息刺激股價彈高9.76%至567.50元。近期玩拆細玩得最誇張的，要數亞洲聯盟（616），公司上周公布1送9紅股，即變相1拆10，若以噚日收市價5.70元計，股價會調整為0.57元。該股4月中低見1.99元，現時累升約1.8倍。黑客話，亞聯乃抽水大王旗下股份，唔容易玩。
港交所（388）噚日升2.33%至59.25元，再次逼近60元關口，港交所有條件拆細，唔知下隻玩拆細股份係咪佢呢？以噚日收市價及每手2000股計，港交所每手入場費接近12萬元，似乎唔啱散戶胃口。
阿虎