梁洛施同關智斌（Kenny）噚日去中環出席「我賞Click」記者會，活動介紹新流動媒體平台，大會仲特別安排兩位穿着橙色背心嘅少女，負責在場手持產品介紹，而其中1位少女，就係日前去參加香港小姐面試，更被冠以靚版薛凱琪稱號嘅Suki，Suki個打扮就認真騎呢，戴住個插咗張相嘅頭箍，佢面對鏡頭時都顯得好大方，不過就拒絕接受訪問。
送禮得個講字
此外，今個星期日係母親節，梁洛施話當日可能要出埠工作，希望到時媽咪可以同行順便慶祝母親節，佢話：「如果去唔成就返澳門，其實喺我心目中每日都係母親節。」梁洛施又話舊年係佢入行多年第1年有收入，所以會同家姐夾份買1粒卡幾嘅鑽石送畀媽咪，不過平時啲錢由佢媽咪保管，如果問媽咪攞錢，實俾佢媽咪知佢買禮物，所以都可能唔送嘢。
至於Kenny就預早喺上個禮拜日已經同父母食飯，佢話：「因為有嘢做，所以提早慶祝，我請媽咪食魚翅，仲請埋佢哋去泰國旅行。」
