宏利公布咗一送一紅股嘅消息後，雖然成五萬幾蚊一手，但都吸引唔少散戶入貨，一百股一百股係咁買。
噚日一開市，宏利就已經裂口高開20蚊報536蚊，跟住就好似食咗偉哥咁猛，未到11點已升到580蚊！華華有朋友上周已決定，呢個禮拜一「風雨不改入宏利」，可惜佢瞓到11點幾先起身，宏利已經升到570幾蚊，只好摸頂高追。
如果瞓少一粒鐘，呢位朋友賬面已經賺4000蚊，呢粒鐘真係好貴，可惜去到下晝，宏利突然腳軟，仲跌到去560蚊，好彩尾市後抽上567。
為咗瞓多一粒鐘，由每股賺40蚊變咗倒蝕10蚊，華華只好希望宏利早日上600蚊，等佢唔好蝕錢。所以都係奉勸各位，有心買股嘅話，記住早啲起身昅實個市，唔好瞓過龍。