最重磅嘅滙控（005）同中移動（941），總共帶動恒指上升224點，包咗總升幅（287點）近8成。市場錢多，向重磅股埋手，不妨睇吓有冇其他重磅股稍稍落後，搵佢哋嘅C輪短炒。
中石化C輪4720：石油股中，中石油（857）最醒神，收9.55元，升0.30元，創新高。H指中，中石油佔比重最大，達16.6%，其次係中石化（386），佔10.2%。中石化最高5.35元，收5.25元，只係爬高斗零。中石油行完，好快到中石化，上次高位5.55元，話唔埋三兩吓手勢就升破。
搵中石化C輪炒，正路之選係4720。隻輪9月初到期，輪價51仙，溢價5.5%，槓桿率10.3倍（有效6.3倍），引伸波幅35.4%。昨日微跌1格，適合鍾意買落後貨色炒家埋手。前星期高位69仙，遲吓可能證實唔係高位。
和黃C輪2211：和黃（013）收77.75元，升得0.40元。恒指成份股中，滙控同中移動噸位最重，第3就係和黃，市值3315億元，佔恒指比重6%。有心人要谷起個市，和黃好難唔成為托高對象。
搵和黃C輪落注，2211最靚，6月尾夠鐘，輪價41.5仙，溢價0.5%，槓桿率18.7倍（有效13倍），引伸波幅21.8%。想揀長期啲，則諗4762，11月尾先至夠鐘，當然要畀高啲溢價（4%），輪價0.72元，槓桿率10.8倍（有效7倍），引伸波幅23.2%。
章盛