港股在17000大關略作整固，又再發力上衝，恒指大升287點，衝上17300水平，成交暢活，有415億元。中資股升勢更勁，H指大升218點，升幅3%。
不過，大市升勢集中在藍籌同中資股，個別二三線股則有沽壓，不計認股證的上升股有460多隻，但下跌股亦超過300隻，股民並非盲目看好。今次升市，由大行同基金發動，大藍籌同大國企，貨源已歸晒邊，佢哋部署咗咁耐，做咁多工夫，後市照計仲有排升，到二三線股百花齊放之日，先要小心。
金威集團（910）在0.30元水平消化整固，係時間進行收集，等待下一個升浪來臨。金威噚日股東特別大會，已通過發行新股及CB，收購高科植林業務，07年之後，估計單係植林業務，每年已可提供超過2億元盈利，相比04年獲利只200多萬元，直情係脫胎換骨。金威股價整固，相信唔會耐，再展升浪的第一個目標係0.36元，中線以長達一年半大圓底形態計，量度升幅目標係0.50元。
預測PE不足9倍
賭業股近期表現較佳的有新濠（200）、銀娛（027）同黃金集團（1031），其中尤以黃金集團的消息最勁，短線可留意。
黃金集團05年（12月年結）盤數有虧損2.92億元，主要係要提撥控股股東饋贈股份之開支約4.48億元，其實，公司在經營酒店同賭場方面，已有可觀收益，亦係除咗持有賭牌者外，有實際數字可計嘅濠賭股。
睇番盤數，去年集團來自酒店及娛樂業務營業額達2.44億元，旗下的皇家金堡酒店及君怡酒店（均是去年完成收購），為集團帶來7個及9個月的盈利貢獻，而酒店買入價分別為12.5億元及5億元，去年底估值已上升到12.8億元及7億元。
今年首季，來自中場賭枱「殺數」有雙位數增長，料會吸引更多高注碼客戶；兩酒店平均入住率70%及80%，並會提供全年貢獻，估計06年盈利可達3億元，預測PE唔夠9倍，在賭股中，確實好有吸引力。
黃金集團已出售手錶業務，專注澳門娛樂事業，同時削減股本面值，以及加埋其他進賬，將去年底累計虧損7億多元全數抵銷，為日後派息鋪路。個位數PE嘅濠賭股，若然有基金睇中，相信股價好快會升2至3成。
郭兆誠