嘉亨灣事件餘波未了，班地產商日日鬼殺咁嘈話屋宇署審批圖則手腳慢，似乎好懷念梁展文時代。消失咗一排嘅前屋宇署署長梁展文呢兩日將會再次成為焦點，知情人士同八方講，港府最快喺今日或者聽日，會公布由3人獨立調查小組就嘉亨灣事件進行嘅報告，聽聞梁展文會大步檻過，即係話佢咁都唔算亂用酌情權批地畀發展商恒基喎。
另外，立法會政府賬目委員會噚日開會，就審計署報告質詢港台高層，議員炮轟港台之前，竟然先向許仕仁開火。賬委會主席黃宜弘公開批評官員喺審計署長報告提交立法會前，肆無忌憚咁向傳媒放料，報告公開後又頻頻自辯，「超越咗純粹回應傳媒查詢嘅範圍」，賬委會感到好遺憾喎。
黃宜弘話已去信政務司司長許仕仁，促請佢指示下屬遵守遊戲規則，唔好亂咁放料。肥龍辦公室話稍後會回覆。
傳真︰2623-9278
電郵︰[email protected]