老實講，我從來唔係舞台劇發燒友，睇過焦媛在《誘心人》嘅演出，最深刻的印象唔係情節，而係佢成身白滑嘅皮膚。原來佢媽咪好鍾意燉燕窩畀佢食，不過焦媛覺得啲燕窩腥，唔係次次都肯食，搞到媽咪無佢符，真係皺紋都多幾條。因為咁，今次焦媛趁住母親節來臨，親自落廚整幾個誘心滋補養顏菜，燕窩、魚翅、雪蛤通通有齊，實行錫番媽咪。
記者：梁雅芳 攝影：陳盛臣
示範：焦媛 大廚：關志強＠翠亨邨
地址：尖沙嘴彌敦道132-134號美麗華商場地下（23762882）
紅梅魚翅盞一啖一花瓣
聞煮價：$150/5人
需時：20分鐘
整出來真係好似成朵花咁，豆腐做花瓣，金菇做花芯，賣相簡直100分。豆腐炸過之後好香口，但又唔會太油膩，一啖食一塊花瓣落肚，成個都靚晒！
焦媛：「絞爛啲豆腐容乜易，我最醒就係搞破壞喇。個菜睇落好複雜，估唔到做起來都唔係太難。嗯，豆腐炸一炸，聞落就已經好香喇！估唔到魚翅可以釀落豆腐度，味道仲咁夾㖭。」
咩料
金錢骨翅1両（預先煮腍）、雞蛋1隻、金菇2両、鹹蛋黃2隻、雞湯2両、豆腐1件，鹽、糖、椒鹽、生粉、麻油適量
速成法
1.雞蛋取出蛋白，豆腐絞爛，加入蛋白、生粉以及鹽、糖調味。再用碟仔裝住，加入隔夜煮腍的魚翅鋪面，隔水蒸8分鐘。
2.倒出豆腐，沾生粉落鍋稍炸後撈起，鹹蛋黃蒸熟，壓碎鋪在豆腐面。
3.鹽、糖、生粉、麻油及雞湯煮芡，金菇沾上椒鹽炸香，與豆腐一齊砌碟，最後將芡汁淋上。
聞煮貼士
最好用保鮮紙先墊在碟仔底部，就會好容易將豆腐倒出來。
杭菊彩雲雪耳潤肺下火
聞煮價：$15/4人
需時：15分鐘
杭菊焗出來的茶清香撲鼻，加埋白雪雪嘅雪耳，清心潤肺，健脾下火，飲一啖個人都即刻無咁燥。最後淋上蛋白，利用茶的熱氣蒸熟佢，效果好似一絲絲彩雲咁，非常靚，個茶飲落仲香滑啲㖭！
焦媛：「好鍾意呢個茶，因為簡單易整，最啱我呢啲怕麻煩嘅人。我媽咪亦都好鍾意飲茶，返去得閒就整畀媽咪歎吓。」
咩料
杭菊1両、雪耳1両、南北杏5錢、冰糖2両、雞蛋1隻
速成法
1.杭菊用滾水焗茶，隔渣後落冰糖。
2.南北杏同雪耳蒸腍，加入茶中，然後用微波爐叮3分鐘。
3.雞蛋取出蛋白，淋入茶即成。
聞煮貼士
焗茶不能焗得太耐，如果唔係茶會變酸。
英文
ChrysanthemumTeawithWhiteFungus
DIYPrice：$15/4persons
Time：15minutes
Ingredients：40gchrysanthemum,40gwhitefungus,20gChinesealmond,75grocksugarand1egg
Method：
1.Maketeabycookingthechrysanthemuminboilingwater,filterandaddinrocksugar.
2.SteamChinesealmondandwhitefungusuntiltenderandaddthemintothetea,thencookfor3minutesinamicrowaveoven.
3.Takeeggwhiteoutoftheeggandpouritintothetea.Serve.
Tips：Donotcooktheteafortoolong;otherwise,theteawilltastesour.
印尼文
JamurKupingPutihDenganBungaSeruniHang
HargaDIY：$15/4orang
Waktumasak：15menit
Bahan-bahan：40gbungaseruniHang,40gjamurkupingputih,20gbijiamandel,75ggulabatu,1butirtelur
Caramembuat：
1.RendamkanbungaseruniHangdlmairpanas,ambilairnyadantambahkangulabatu.
2.Kukusbijiamandeldanjamurkupingputihhinggalunak,masukkankedlmtehbunga,panaskandlmovengelombangmikroselama3menit.
3.Ambilputihtelurdansiramkankedlmteh,sajikan.
Tips：Janganmerendamkanbungaserunidalamairpanasterlalulama,kalautidaktehbunganantiakanterasaagakasam.
（繙譯：語言專家諮詢公司 電話：23648988）
燕窩扒白玉柳清甜透心
聞煮價：$150/4人
需時：20分鐘
好似白玉般雪白的冬瓜絲，食落煙韌，燕窩滑一滑，成個菜清甜透心，好啱啲食得清啖嘅人士。燕窩嘅美容功效大家唔使講都知喇，拿拿臨食多幾啖喇！
焦媛：「媽咪以前成日都燉燕窩畀我食，不過，我總係驚燕窩有腥味，唔係好敢食。我媽咪好識滋補，少食多餐，而且口味清淡，燕窩咁滋潤養顏，最啱整畀媽咪補一補喇！今日我先至發現，原來燕窩可以一啲都唔腥，而且仲滑過我啲皮膚啊！《誘心人》6月中又要再公演，我都要食番啲補吓身先！」
咩料
濕碎燕1両、冬瓜（切絲）10両、雞蛋1隻、鮮荷葉1塊、雞湯2両，火腿粒、鹽、雞粉、胡椒粉、紹酒、生粉、麻油適量
速成法
1.冬瓜切幼絲稍灼，撈起用毛巾索乾後加少少生粉，然後加雞湯煮腍。
2.雞蛋取出蛋白，落熱油炒至嫩滑，再加入鹽、雞粉、胡椒粉、紹酒、麻油同生粉勾芡。
3.鮮荷葉用滾水稍灼後用來墊底，鋪上冬瓜；濕碎燕用雞湯煨入味，加入火腿粒，與蛋白芡汁稍煮，然後鋪面。
聞煮貼士
用毛巾索乾冬瓜時要用陰力，如果唔係冬瓜會好容易爛。而加啲生粉落冬瓜度，會令到冬瓜更加煙韌。
點揀燕窩
市面上成日有人利用豬皮冒充燕窩，企圖魚目混珠。等我醒你幾個小貼士，教你分辨吓喇！
1.顏色：真貨色澤天然、微黃；
2.纖維：真燕窩纖維條紋顯著，呈現不規則，但假燕窩條紋較有規律；
3.味道：真燕窩本身冇味，但以豬皮充真貨者聞落有油饐味，而燉好後，部份燕窩如越南燕盞會有蛋香味。
水晶魚皇爽雪蛤嫩滑滋補
聞煮價：$300/4人
需時：30分鐘
呢個菜嘅來頭一啲都唔嘢小，曾經於03年嘅「美食之最大賞」攞過「鮮魚」組嘅「至高榮譽金獎」。肉質嫩滑的東星斑，配上雪白爽口的雪蛤膏，色澤紅白分明，一啖入口極之鮮甜，仲非常滋補㖭。
焦媛：「嘩，啲魚肉真係好嫩滑呀！師傅教我整嘅時候，要記得索乾條魚身再調味，會容易入味啲。我同媽咪都好鍾意食海鮮，呢味菜啱晒胃口。我成日要排戲，好少時間陪媽咪食飯，今年母親節都要做嘢，惟有提早同家姐陪佢去飲茶慶祝。今日煮幾味當係補數囉！」
咩料
東星斑14両、濕雪蛤1両、竹笙（剁碎）1両、雞蛋2隻、鮮奶3両、雞湯12両，薑、葱、杞子、紅椒、鹽適量
速成法
1.東星斑劏好，用生粉省勻再洗乾淨，以毛巾索乾，再用切碎的薑、葱加鹽調味，在魚身淋上生油，隔水蒸熟，然後去油。
2.濕雪蛤、竹笙（剁碎）以雞湯煨入味，瀝乾水份。
3.雞蛋取出蛋白，加鮮奶、雞湯，與濕雪蛤、竹笙一齊稍煮，然後淋在魚面，最後加杞子和紅椒點綴魚身。
聞煮貼士
想啲雪蛤唔腥，浸佢一陣之後，就要剝咗外邊層膜，同埋清除裏面的腸及雜質。買靚雪蛤記得要揀大粒同實心嘅，唔好買好似蟲仔咁樣捲埋一嚿嗰啲！
大廚Profile
關師傅入廚經驗成30年，在翠亨邨已經做了17年。他最拿手是煮中菜，目前是美麗華翠亨邨的廚房主管。關師傅話，要煮出好味道的菜，除了食物材料要新鮮之外，最重要是要投入，落足心機煮菜，尤其魚翅、鮑魚之類的菜式，更要加倍耐性，否則煮不出材料的精髓。
