聽聞Nike找來陳冠希搞Crossover，以為又係玩明星效應呢科，搵粒星幫手喺對鞋上吓色、畫隻龜呢類合作，宣傳意味大於一切；今勻跟Edison及MC仁直接見面，聽２人詳談呢對AirMax香港限量版產生過程，才知道原來咁多年以來，Nike從未跟過本地創作人合作搞新鞋，陳冠希加MC仁係第一次，整個合作計劃經歷兩年時間、反覆跟Nike總部蹉商多次才拍板，今勻呢趟「交叉乘」，唔算亂嚟係咁意。
記者：吳小明 攝影：譚盈傑
中醫概念AirMax香港版
既是香港版，Edison和MC仁以香港中西文化交滙的特色出發，就變得順理成章。設計概念融合傳統中醫理念和運動科技，包括鞋墊印上足部的經脈位置，透明鞋底內的足部圖則將湧泉穴位置特別強調出來，鞋身顏色選擇橙、綠、紅3色，均有顯示中國文化色彩的用意，例如橙色代表印泥、綠是傳統九宮格圖顏色等。根據中醫理論，宇宙萬物間，皆有氣運行其中，人體亦不例外。氣運行於人體十二經脈，經雙足與大地互通；而經脈上的穴位，則能影響或反映氣的運行狀態。種種設計細節，皆表現出致力反映東西相融、植根香港的中國精神，雖然不免有點刻意，但總比畫龍題字就等於中國來得有心思。
陳冠希、MC仁：2年前Nike覺得我哋未夠班！
Q：記者 E：Edison 仁：MC仁
Q：今次是第一對香港限量版，舉凡以香港為主題的Crossover創作，好多時便以中西合璧的概念出發，今次也不例外，覺唔覺得這樣太順理成章、太意料中事？
E：其實一直是我想找Nike合作，想幫Nike設計一對鞋款，是Nike覺得我未夠班；直到自己舖頭Juice發展上咗軌道，又成立咗自己嘅創作單位Clot，開始有點成績，Nike終於覺得可以讓我一試。由始至終我都想將香港中國傳統的一面，融合在呢對鞋嘅設計中，並唔係貪方便，講香港就用中國概念咁「求其」，雖然我係喺外國長大及生活，但返來香港發展，就有一種好強烈「自己是一個中國人」嘅感覺，但係始終對中國文化認識尚淺，所以就搵MC仁合作一齊諗。
仁：最初我嘅想法仲激，想過全對鞋用紙做，用上種種中國色彩的設計。講真我從來唔着波鞋，當初Edison搵我一齊諗，我就經已諗緊點樣令呢對波鞋可以「無咁波鞋」，例如透明膠鞋面露腳趾已經好唔波鞋，又同Nike傾點樣可以令對鞋可以「踩踭」着，終於用上比一般波鞋後踭位薄好多的LowLiner設計。呢啲細節度咗好耐，亦要一一向Nike總部爭取，所以前後要年幾兩年。用上中國概念去做並唔係貪就手。
Q：點解揀中AirMax呢對鞋款？
E：我係從自己最鍾意的鞋款出發，當初諗過95AirMax、AF2、Woven等等，最後揀AirMax1是因為佢係第一代，夠經典，是整個系列的始祖，有種Startallfromthebeginning的感覺。
Q：用上透明膠面做鞋面，透氣嘅問題點解決？你哋着咗唔夠10分鐘已經出現水氣，咁對鞋係咪好焗腳？
E：喺設計過程經已發現呢個問題，有諗過做氣孔設計，但係Nike方面話透明膠面再打窿，會比較易爛，所以都無改。我哋建議大家可以自行「拮」幾個窿來幫助透氣，仲可以拮出一個圖案來，自行Customized自己對鞋。
仁：呢個未係咁圓滿嘅設計，係我哋專登留畀用家自己處理嘅，若果乜都做晒，完全唔使你哋諗，咪係純粹嘅消費行為囉，𠵱家咁大家仲有些少空間自己郁手去令對鞋更啱自己，着得更舒適。（吓？呢個都可以係理由，講真筆者就真係「𢱑頭」，好難同意喎）。
Nike公關Angel補充：對鞋全球發行，Nike揀選咗世界各地共13間舖頭先有得賣，而且全部都是潮界龍頭舖頭，好似巴黎Colette、日本Atmos、紐約Recon同Supreme等等，各地配額都係各得20對，相當之Exclusive。
售賣點：Juice（28810173）銅鑼灣百德新街53號海德大廈2樓A舖