「一家人去旅行，最怕搭的士去機場，載得人嚟又唔夠位擺行李，Call部貨Van又怕累司機大佬俾人捉話佢走白牌，那倒不如揸部7座位平治Vito去機場，全家人坐得舒服之餘又可以擺晒所有行李，咁樣咪大條道理唔使『客貨分家』，方便大家囉！」
記者：鄭達基
攝影：譚盈傑
模特兒：Ruby
「這部平治Vito1197座位版是新Version，外觀渾圓有點像私家車外，大到你唔信嘅左右電動雙趟門，還有DVD影音系統，也是它的重要SellingPoint。」
大得很的電動雙趟門，輕按控制鍵即可自動開關，低重心車廂設計也方便上落乘客和行李。
現在，我跟大家講講一部大型MPV要取得成功，到底有甚麼因素包含在內。第一，車廂空間一定要夠大，最好大到可以喺車入面打觔斗、第二，3排座椅都要令乘客坐得舒舒服服，最緊要用真皮做、第三，前後座都要有冷氣，如果唔係一定被乘客投訴、第四，車頂要有天窗，可以的話就唔該2個以上、第五，中後排摺起之後，尾箱大到可以連十幾件行李都擺得落。若以上五點缺一，即時會被Out！來自德國平治門下的Vito1197座位MPV，當然合乎我剛才所講的五大成功元素，之不過咁，部車仲加多2個Bonus喎！係咩？咪係好多MPV恨都恨唔到有嘅電動雙趟門，仲要係大嗰隻，加埋超低地台設計，上落乘客或行李都好方便，另外一個就係車廂內有套DVD影音系統（需另加$13,000），有咗佢搭長途車仲使怕悶？
無錯，平治Vito個Look望落去真係好似成部貨Van咁，大部到你唔信，之但係你望真啲，佢渾圓嘅車身線條，又有啲私家車Feel喎，係咪正呢？
Vito嘅外觀，向來都係大大部，好似成部貨Van咁，但係如果你再望真啲，就會知道佢嘅線條其實好渾圓，加埋嗰個好有私家車Feel嘅車頭設計，嗒落係咪覺得佢似一部用嚟載人載貨，唔使「客貨分家」嘅家庭用MPV呢？至於車尾囉喎，唔使問都知道佢一定有隻大尾門。今次呢隻尾門可以開啟嘅幅度認真大，再加埋佢本身嘅低地台設計，要將行李搬入或搬離尾箱真Easy。旁邊一對差點由車頂拉到去車底嘅直立式尾燈，顯示夠晒清清楚楚，縱使後車離你九丈遠都睇得到。
3.2公升V6引擎的好處是甚麼呢？當然是好力和運轉寧靜，但懸掛設定偏向舒適和車身高，過彎時記緊不要太急進。
你肯定會話：「咁大部車，唔會用台2.5公升偈啩？」無錯，呢部車的確唔係用2.5公升偈，用嘅係一台3.2V6偈，它的優點當然又是那句老調子：「好力又好靜」，前者我從來都唔會唔信，加埋5前速+/-半自動波箱，簡直係最佳配搭，但後者卻有點保留。不過，在試車後對這個Point的感覺也變成正面，因為關上車窗後，車外的噪音差不多全都不能進入車廂，在車外聽到的引擎聲響也不高，值得一讚。但大家要留意它的懸掛設定偏向舒適和車身高，過彎時要小心。
平治Vito1197座位版規格
引擎：3199c.c.V6DOHC
馬力：190hp/5600rpm
扭力：270Nm/2750-4750rpm
傳動：5前速半自動波
尺碼：4993×1901×1875mm
售價：$618,000
查詢：仁孚行（28957248）
出車資料
車價：$618,000
牌費：$7,747
保險：$28,086（以0%NCB計算）
出車總計：$653,833
首期：$65,383
利率：5%
年期：4年
每月供款：$14,712×48期
（以H.P.計算及只供參考）
新車評一評
加速：B 反應不俗。
轉向：C 車體大，要習慣。
制動：A 反應快。
車廂噪音：A 靜得很。
舒適：A 勝在空間大。
耗油量：B 要慳油有點難。