台灣第17屆金曲獎日前公布入圍名單，去年都有提名嘅周杰倫，今年竟然食白果，冇歌入圍！最慘嘅係大會諗住周杰倫會入圍，為咗唔想啲人再攞周侯戀新聞炒作，所以專登唔請侯佩岑做大會司儀，結果周杰倫食白果之餘重累埋女友冇得撈，真可謂累鬥累。
陶喆轉軚
周杰倫噚日離開台灣去北京拍戲，就話唔介意冇入圍金曲獎，又話：「我覺得鼓勵該鼓勵的人，給沒有資金做宣傳的音樂人，讓他們做更好的音樂。」不過頒獎禮當日佢話要拍戲唔可以返嚟參加。
而周杰倫勁敵陶喆3年前嘅專輯《黑色柳丁》喺金曲獎失利之後，佢已經炮轟過頒獎禮唔夠專業，幾年嚟都再冇出席呢個活動，但陶喆今年就最多提名，總共有6項，原本未公布名單前，佢話到時會喺美國錄唱片，金曲獎當晚應該出席唔到，點知名單出咗嚟之後，佢竟即刻改晒口風，話到時喺台灣嘅話就會出席。但陶喆經理人就否認話：「他的檔期一直變動，我們從沒改變說法，一切要看他在不在台灣。」
即時改口
另外，周杰倫喺機場巧遇要去北京拍廣告嘅組合S.H.E，S.H.E同佢一手捧紅嘅南拳媽媽咁啱一齊入圍爭最佳團體獎，問佢睇好邊個，佢話：「這還要說嗎？」點知正想講埋落去嘅時候，就睇到S.H.E喺附近，所以改口話：「當然是S.H.E和南拳媽媽！」
