Karen：TradingDesk，Karen。
謝太：Karen？我有間公司想問你意見，福記食品，股票編號1175。
Karen：福記食品，謝太，你眼光都幾好，呢間公司由佢上市起，一路係我其中一隻愛股。謝太，你突然間對呢間公司有興趣，係唔係聽到啲內幕消息呢？
謝太：冇……上個禮拜諗住見係黃金周，我咪上大陸突擊咁探吓開廠嘅妹妹，諗住surprise吓佢。點知原來佢間廠係唔放五一黃金周假，所以個妹都好忙，我睇住佢間廠啲員工，同埋一排一排嘅衣車，就好似時光倒流咁返咗幾十年前嘅香港。咁你都知道我八卦㗎啦……
送餐生意3季3.76億
Karen：謝太，冇人認自己八卦㗎，呢啲叫做好奇心重！
謝太：哈、哈！冇錯，係好奇心重，我就叫個妹帶我行勻全廠。間廠裏面真係乜都有，就連籃球場都有。咁行到個飯堂，我個妹就叫我順便喺度食飯。原本，我驚啲大陸飯堂唔亁淨，都唔係好想，不過我都未開口，個妹就笑我話：「我知道你個心諗緊啲乜，你怕呢度啲嘢污糟係咪？不過你估我唔擔心得過你咩？如果飯堂啲食物唔亁淨，搞到啲員工集體食物中毒，我間廠咪要停工？」咁我諗，橫掂自己好奇心咁重，咪試吓囉。估唔到啲嘢都幾好食，完全出乎意料之外，我就即刻問個妹飯堂主管係邊個，等我可以讚吓佢。原來個飯堂已經外判咗畀一間叫做福記食品嘅公司，佢仲話福記喺香港上咗市，所以我咪打電話問吓你買唔買得過囉。
Karen：其實福記食品除咗有送餐畀工廠、學校飯堂之外，仲有開自己嘅餐廳，同埋賣預先包裝食物。不過，送餐服務就一定係福記嘅主打，截至03年3月31日，12個月做咗1500萬人民幣生意；去到05年仲升到2.37億人民幣。淨係05年4月到12月，3季送餐服務已經做咗3.76億人民幣，佔公司營業額68%，比起03年嘅12%多好多。
1蚊收入利錢達4毫
謝太：係唔係因為佢割喉式去搶生意？
Karen：睇條數就唔似，福記最厲害嘅地方，係就算呢幾年生意做多咗咁多，佢每1蚊收入，就有4毫子利潤。最緊要係佢哋𠵱家每日平均賣28萬份餐，但公司已經準備好70萬份餐嘅產量，所以只要有市場，福記就可以繼續擴充業務。咁謝太，如果你想買呢隻股票，你就要問自己大陸工人同學生嘅數量，可唔可以消化70萬份餐嘅產量嘞？
謝太：咁講唔好話70萬份餐，700萬份餐都得啦。
Karen：最後，好似謝太你個妹話，食物安全對生產力非常之重要，喺假貨、次貨充斥市場嘅大陸，最好就係將食物供應外判，畀一間可以集結好多間飯堂購買力，有信譽嘅大公司，咁福記食品仲有對手？雖然福記每1元利潤，要用30元去買，不過如果福記可以每年將利潤增加50%，3、4年之後利潤就會增加3倍。
謝太：我個妹對福記食品嘅服務非常滿意，佢仲同好多行家講，叫佢哋幫襯福記㖭。Karen，我決定信福記，幫我落盤啦！