近排靠翻炒狂搵真銀嘅SNKPlaymore，第四輯Online珍藏系列就出番《龍虎之拳～天．地．人～》，賣點係1碟打齊全系列三代版本，玩番晒當年浮誇到痹嘅系統，好似氣功波高過人、龍虎亂舞扣人8成HP等，最搞鬼梗係用絕招KO對手時，可以爆埋佢件面衫，就算係女性敵人一樣照爆！
文：陳福榮
對應機種：PS2
遊戲類型：FTG
遊玩人數：1至2人
開發商：SNKPlaymore
推出日：5月11日
售價：$325
同之前嗰三隻Online珍藏系列一樣，今次《龍虎之拳》都係針對MMBB網上對戰系統，佢仲可以記錄低閣下嘅戰績㖭，但正如之前介紹過畀大家嘅《拳皇MI2》一樣，如果上唔到網就可以當佢係單機遊戲得喇。由於佢係喺主目錄畫面揀定遊戲，因此入咗Game就已經唔使再Load碟，呢種設定認真爽爽。
巨大角色夠逼力
話明係陳年翻炒名作，真係唔同大家講吓啲歷史都唔得。《龍虎1》係當年SNK被吞併前嘅重頭作品之一，影響力拍得住《餓狼》同《侍魂》。無他嘅，角色真係做到好鬼死大，當黐埋身嗰陣幾乎佔成三分二個畫面，誇張到爆燈，就憑呢點佢可以喺《街霸》獨大嘅格鬥市場穩佔一席位。此外佢引入咗女角輸咗會爆衫嘅設定，仲有超必霸王翔哮拳以及史上首創嘅亂舞技「龍虎亂舞」，嗰種震撼當年喺機舖真係令人歎為觀止，只可惜今次佢完全照Dub街機版，單打模式依然唔可以揀其他人嚟用。呢種離譜程度真係擺明係用模擬器嚟出。
招多人多似《拳皇》
《龍虎2》除畫面同操作大幅改良外，最正當然係一開波就畀你用齊咁多個角色啦，亦因為咁遊戲壽命就得以延續，唔會齋得兩個主角坂崎亮同Robert用咁悶。不得不提嘅係，本作隱藏大佬係《餓狼》嗰個傑斯嘅年輕版，招式霸道到被人堪稱屈機之王，各位不妨挑戰自己技術去試吓砌低佢！
第三集竟然叫做《龍虎外傳》，主角由Robert坐正，除咗街機版就只有響NeoGeo盒帶版同CD版出過，換言之今次係首度移植落其他機種。《龍虎外傳》屬廠方有意破舊立新之作，不但一次過Cut晒大部份舊角，仲採用類似3D格鬥遊戲嘅MotionCapture嚟做動作，好自豪咁標榜每招打出嚟都好鬼靚，真係似足真人打交咁款！不過呢點亦係佢嘅死穴，當年唔少人投訴佢節奏太慢，係慢到有啲難頂嗰隻！
龍虎亂舞點出？
講到龍虎亂舞咁勁，其實都要符合幾個條件先出到；首先能源Bar要「見紅」，跟住儲滿絕招Bar，再輸入↓↘→＋CB就得。
