信用卡市場競爭咁大，要留住啲舊客就難上加難！所以唔少發卡銀行，都會盡量𠱁啲客仔，用張卡做自動轉賬，最好就梗係水電煤呢啲經常要交嘅費用，好似美國運通張新卡，就出咗呢一招。
AE今次同港燈合作，新客用佢哋張卡做自動轉賬交電費，頭一個月就有15%（上限500元）電費折扣，又可以儲分，AE仲專登搵人扮燈膽隨街行博宣傳，不過淨係港島先睇到。雖則唔係乜大優惠，但點都好過等超人開恩，先有電費減吖！
講開AE卡，佢哋有個賠償條款，就係啲客可以將買咗唔滿意，或者爛咗嘅貨品，交畀AE退番錢，所以每年都收收埋埋好多貨品，當中衫褲鞋襪乜都有，咁點處理呢？AE話，佢哋會定時將啲物品，以優惠價或者拍賣形式賣畀員工，籌到嘅錢就做善事，都算一舉兩得。