上周五美股砰砰聲上，滙控（005）ADR價折合140元，高過本港上周四2.80元，有揸滙控C輪嘅，今朝面口好似四萬。
炒輪賺開錢嘅，乘勝追擊。未賺過錢嘅，或者啲錢等住用嚟糴米，則小心啲，或者注碼輕手啲。相關股票如果唔係開得太高，搵C輪炒。
建行C輪2293：建行（939）上周全周升0.10元，收3.45元。國內加貸款利率對佢有利，股價繼續向上。搵C輪埋手，2293有得諗。
2293有差不多3個月壽命，輪價40.5仙，溢價1.8%，槓桿率8.5倍（有效6.9倍），引伸波幅27.1%。建行C輪唔少，有啲稍為長命少少，但有效槓桿率唔夠7倍，而要畀超過13%嘅溢價，條件輸蝕，睇少兩眼可也。
交行C輪2292：交行（3328）與建行移動方向相同，值得睇好。搵C輪埋手，揀2292。
2292有2個月壽命，輪價50仙，溢價0.3%，槓桿率9.8倍（有效7.9倍），引伸波幅25.7%，數據唔錯。
中銀C輪3590：中銀（2388）亦堪睇好，搵C輪炒，3590值得諗。隻輪有5個月壽命，輪價87仙，溢價2.5%，槓桿率18.8倍（有效9.6倍），引伸波幅22.2%。
章盛