近月股市大時代，新股一上市就升幾成，H股亦大上大落，上禮拜五滙豐在美國升破百四蚊，今日都肯定又癲。市況咁旺，小股民簡直如癡如醉，日日睇住個市諗吓點魚翅撈飯，但係若果有心水而落唔到盤，都幾閉翳。華華近來經常聽到有股民投訴，話滙豐、永亨同中信嘉華嘅網上交易系統都曾經出事，喺大成交兼大升跌嘅日子落唔到盤，你話唔激氣就假。
其中有位吳小姐同華華講，有日朝早大市向下，佢諗住沽貨離場，點知佢用開嘅中信嘉華網上系統死咗機，由9點半到中午都用唔到，佢即時打電話去分行，點知分行話係成個系統down咗，愛莫能助。吳小姐話當日睇住個市係咁跌，又冇得止蝕，足足唔見咗成萬銀，覺得好寃枉，佢話一於要去金管局投訴，就算冇得賠，都要當局關注吓。
傳統經紀應食住上
華華問番中信嘉華，佢哋承認當日系統係有問題，要到11點九先至回復正常，佢哋都收過投訴，但就唔算多。
現時喺網上買賣股票嘅股民都唔少，貪佢夠方便兼佣金較低，但係科技嘅嘢始終有風險，如果成日出事，對市場信心點都有影響。而傳統經紀應該把握呢類機遇，搶番啲生意，唔好成日掛住打高爾夫球。
李華華
讀者如有任何意見或報料，歡迎發送電郵至[email protected]。