美股上周五升成咁，今日港股點計都應該受惠，如果滙控（005）今日守喺140元樓上旳話，港股將會炒過不亦樂乎。
近排除咗大藍籌買盤勁之外，好多二三線細價股亦趁勢炒作，好似話會投資森林資源的金威（910），單交易已經講咗好耐，而今日終於舉行股東特別大會表決。不過，上周四長假期前夕，金威股價已經有異動，最高見0.31元，收0.295元，大升11.32％，原來又係52周新高。
炒高料有後着
金威原本搞開服裝，家陣走去種樹苗，睇落風馬牛不相及，但經紀陳話家陣大市流行轉型搞資源，無論金銀銅鐵、石油或者煤都炒到㷫烚烚，樹木亦一樣有賣點，反正炒作二三線股，最緊要都係街貨夠唔夠亁，同埋有無大水喉射住。
佢又話，金威今次以5.6億元進行收購，暫時只係畀咗5000萬元現金，其餘發行可換股票據同承兌貸款支付，但家陣市旺，若然股價炒得起，順便批埋股又何妨？
慕容小初