今期真係唔知道花旗國牛仔總統抽咗邊條筋，走去周圍搵交嘈、辣火頭。首先有國家主席胡錦濤，去到華盛頓嘅時候，被西翼群英話，《義勇軍進行曲》係中華民國嘅國歌。仲要「享受」一個白宮特別篩選出嚟嘅法輪功學員，長達三分鐘嘅「問候」，夠晒「畀面」。好在胡主席有風度、冇反枱，畀孫柏文嘅話，一定會買張世界地圖送畀白宮，跟住用我隻金手指去篤畀佢哋睇，中華民國同中華人民共和國嘅分別。
花旗國牛仔總統玩完我哋國家主席之後，又派佢嘅副總統切尼，高姿態大罵俄羅斯政府，話佢哋供應歐洲嘅天然氣飄忽不定，用嚟要脅歐洲。仲話俄羅斯政府好唔負責任，所以花旗國為世界和平，就走去幫俄羅斯啲鄰國，去抗衡俄羅斯嘅威脅。花旗國好似完全唔理會，俄羅斯鄰國呢幾年經過啲「有色革命」之後，已經令到俄羅斯政府覺得四面受敵，國家分分鐘會滅亡嘅感覺。
咁花旗國牛仔總統走去刺激吓俄羅斯同祖國，都已經係指定動作，分析員話齋，「在預期之內」。不過，令到我覺得唔尋常嘅，就係連一向非常受花旗國愛戴嘅陳水扁都被迫一定要去阿拉斯加加油，唔知道係唔係因為花旗國好似我哋祖國一樣鬧油荒，而唯一一個有飛機油嘅地方係得阿拉斯加呢？總之呢一連串舉動，畀我嘅感覺係花旗國牛仔總統，覺得自己喪失咗「世界話事人」嘅地位，所以出嚟做啲嘢，等大家唔好覺得花旗國已經不問世事。又好似我哋特區啲立法會議員一樣，「做fa
儲定籌碼談判
咁除咗有十幾萬士兵喺伊拉克境內，需要成功保護世界警察形象嘅花旗國政府之外，最關注伊拉克問題嘅就一定係伊朗政府。因為，伊朗政府自從喺八十年代兩伊戰爭，被薩達姆攻擊之後，都好驚會再有一個想打伊朗嘅伊拉克政府。「唔再被攻擊」，我相信係伊朗政府嘅首要目標，甚至如果可以有個同聲同氣，友好嘅伊拉克政府，伊朗政府就開心死喇！花旗國又知道，需要得到伊朗嘅合作，先至可以有一個和平嘅伊拉克，因為伊朗可以令到伊拉克繼續大亂。所以就陰差陽錯咁，伊朗同花旗國產生咗一個相輔相成嘅關係。
呢個微妙相輔相成嘅關係，雙方都清楚明白對話嘅必要性，所以花旗國政府就安排同伊朗政府，對伊拉克前途進行交涉。今次係自從伊朗沙皇落台，聖戰愛好者上台之後，花旗國同伊朗第一次直接官方對話。其實大家見到花旗國同伊朗政府，近期做嘅所有大小動作，例如伊朗話成功研製原子彈，花旗國話要轟炸伊朗，都係為咗呢場世紀大會議，儲談判籌碼，同埋將無關必要嘅政府，例如歐盟、中國、俄羅斯等國家，排出談判室之外。
不過如果花旗國政府「做啲嘢」主導嘅外交政策，唔係為伊拉克而做，咁就連孫柏文都唔知牛仔總統想做乜喇！
孫柏文