今日買咗半個冬瓜返去煮，𠵱家夏天來臨，瓜開始當造，係食冬瓜的好時節。瘦肉、冬菇夾埋冬瓜一齊煮，最後加番磚南乳調味係我最鍾意嘅一道菜。其實冬瓜本身味淡，同好多種材料都夾，點整都好食，煲湯清潤，煲粥仲可以解暑㖭。要揀好嘅冬瓜一啲難度都無，因為街市嘅冬瓜一般都切開來賣，你揀啲瓜肉厚、雪白、肉質堅硬嘅，就係好瓜，個瓜身愈重愈好。有啲人為免麻煩，買時立即叫菜販將瓜皮瓜瓤去掉，其實唔係咁好，最好都係留番啲瓜皮瓜瓤，保持新鮮，要煮食時先至切。冬瓜嘅老嫩就好容易分辨，瓜皮深綠色，瓜瓤空間比較大，而且有少少成形嘅瓜籽就係老瓜。食冬瓜都係揀老嘅好啲，嫩瓜有潺滑感，不夠爽脆鮮甜。如果用來做冬瓜盅，揀圓形或扁圓形就最好。