SONY部PSP不斷升級Upgrade，由1.0到家陣2.7，大大話話都升級過差唔多10次，每次玩新Game都要搞一輪，好多機迷都投訴話麻煩。其實不斷升級，佔最大原因係為抗衡老翻嘅破解，兩者間不斷角力，卒之搵着機迷嚟搞。
從好處想，幾次升級的確令PSP增添不少機能及修補臭蟲，最令電腦男讚賞嘅，只有2.0版同今次最新嘅2.7版；前者新增網頁瀏覽器，睇中文WorldFile都得，後者就支援Flash6.0及繁簡體介面，目前中港台已經有好多機迷升級咗2.7版，仲鬼咁認真List晒有咩好玩FlashGame下載，令到PSP即時多咗好多Game玩！不過電腦男實地測試過，仍有唔少問題出現，好似記憶不足導致遊戲太慢、唔支援新版Flash等，希望嚟緊3.0版能有所改善啦。
香港女仔打機勁
隨着2.7登場，SONY仲首次透過PC下載試玩版，再抄落PSP度畀機迷玩，呢隻《LocoRoco》下載率之高着實令人驚訝，好多人玩過都話正，過癮得嚟又可以好鬼易過關。《爆機狂迷》搶先報道過呢隻試玩版，有讀者Shingo來郵補充咗唔少資料，話早喺上年會展個AGS度，已率先公開畀人試玩，不過遊戲版面同網上試玩版完全唔同，大會更以此為打機皇后之比賽遊戲。呢位Shingo來頭都唔細，乃上年AGS入面嘅打機皇后季軍，下載完隻《LocoRoco》，第二晚已經打爆機，仲要係攞齊20粒LocoRoco、3個小草人同541粒飛蟲果實，真不愧為打機皇后！邊個話女仔唔識打機㗎？
5月7日 心情：佩服