鄭中基、方力申和梁漢文昨日為節目招募美少女廚神，試食參賽者炮製的菜式，鄭中基面對貌美少女乘機口花花撩女仔，又大講有味笑話，而有一參賽者遞上曲奇給三人試食時，鄭中基即指最啱方力申吃，豈料方力申反擊：「你都食過曲奇啦。」互寸雙方與Cookies成員的緋聞。
無綫全新節目《美女廚房》將於本月二十八日晚上播映，節目暫定十集，每集會有圈中名人助陣，介紹廚藝之餘，還會挑選出美少女廚神，昨日無綫在奧海城舉行招募美少女廚神試食大會，由節目主持的鄭中基、方力申和梁漢文任評判，試食前三位男士接受廚技考驗，拋鑊煮火腿蛋奄列，梁漢文竟失手將奄列拋到地上，方力申則手忙腳亂，火腿蛋滿天飛，只有鄭中基成功拋鑊。
講有味笑話
其間參賽者遞上曲奇給三位主持試食，鄭中基即指曲奇最啱方力申，他向方力申說：「好唔好食呀？」方力申聞言後說：「點解淨係問我嘅，你都食過曲奇啦（指跟Cookies成員傳緋聞）。」除了將緋聞搬上台外，兩人又大講有味笑話，有參賽者道明參加菜式是芒果雞柳，並表示是以芒果汁撈雞柳完成菜式，方力申即插嘴：「咁口水雞係咪咁整。」鄭中基又接着說：「咁啫啫雞係咪都係咁呢？」令大家笑不攏嘴。
擺明睇女仔
鄭中基昨日坦言：「嚟試食，都會睇女仔先，自己鍾意女仔入得廚房出得廳堂。」當問到女友蔡卓妍（阿Sa）是否懂得下廚時，鄭中基又表示：「我唔係咁揀飲擇食。」但鄭中基對靚女明顯特別雀躍，參賽者Kat送上一道香煎茄汁大蝦菜式時，鄭中基即被電到高呼：「齋睇個樣都十分啦。」之後才急急補鑊說：「我講隻蝦吖。」事後鄭中基否認撩女仔，還解釋該參賽者是李璨琛女友的朋友，只是搞搞氣氛。
採訪：卓寶花 攝影：陳慧安
