吳日言、葉佩雯以及Krusty昨日到沙田「麥當勞叔叔之家」探訪康復兒童，不過她們卻被幾位小男孩的調皮嚇怕，當中1位小男孩彭彭，更笑言要將甩毛熊人公仔送給她們作禮物，弄得眾人哭笑不得。
吳日言（Yan）、葉佩雯（Grace）以及Krusty昨日帶備10多份玩具，到沙田「麥當勞叔叔之家」探訪康復兒童，眾人首先大唱兒歌，而Krusty的活己嵐更負責彈琴，其餘幾位歌手便與小朋友一同和唱，場面十分溫馨。
母愛氾濫
阿嵐笑言探訪過後母愛氾濫，將來最少要生3個小朋友，她說：「今日我睇見佢哋圍住我唱歌覺得好warm，希望他日我就負責彈琴，我3個仔女就圍住我旁邊一齊唱歌。」
不過其中幾位小男孩就經常駁嘴，令幾位歌手手足無措，最後要出動玩具來引誘對方乖乖就範。
眾星陪跑
當負責人要求其中1位男孩彭彭，送上玩具熊人公仔給阿Yan時，彭彭竟衝口而出說：「好呀，隻熊人甩毛㗎，等我送畀你呀。」阿Yan即時哭笑不得。
其後眾人便去到公園玩耍，部份小朋友即時東奔西跑，Krusty、阿Yan以及Grace見狀只好跟隨他們身後陪跑。另外幾位小朋友又拖着阿Yan射籃、捉着Grace踏單車，不消10分鐘幾位歌手已疲憊不堪。
經過個多小時的探訪，Krusty的張詠恩（Jan）發現小朋友有着無窮無盡的精力，她笑說：「院長同我哋講呢班小朋友之前患過病，不過經過呢個幾鐘之後，我好開心見到佢哋咁有活力，因為見到佢哋咁好精力代表已經康復晒，我希望佢哋日後都健健康康咁成長。」
採訪、攝影：李珮洳
