東方明珠集團主席黃坤，由大廚做到上市公司主席，跟住先後喺地產及科網熱潮中損手，人生大起大跌。佢前2個月又公布天下，透過旗下東日發展，注咗8千萬畀招商廸辰（632），今勻轉向潮爆嘅物流業。
自從消息出咗嚟之後，632曾經由$0.031，被人炒到去$0.088，呢輪就跌番去$0.058，計落都升咗8成7，雖則22日先開獨立股東會，表決接唔接受注資，但都係例行公事，黃坤亦搵晒人埋班，可以隨時開波。
黃主席嘅董事局提名名單，華華最感興趣嘅，係搵嚟馬來西亞前副首相及財政部長安華（AnwarIbrahim，圖）做獨立非執董。呢位仁兄98年被《時代雜誌》選為「亞洲年度風雲人物」，99年入監，04年9月上訴得值獲釋，前兩日重返大馬，仲話08年會再戰江湖。安華同黃坤一樣係大起大跌之人，唔知係咪因為咁，大家惺惺相惜呢？