飛機陳請食飯，大話西遊。話飛機陳大話西遊，並非指佢亂噏，而係以事論事。飛機陳因職業關係，生活在飛機上，朝早札醒，要問吓自己身在香港吖，還是東京、多倫多、紐約、倫敦。佢嘅旅遊故事非常精彩，好似已經寫咗三本書，全世界嘅旅遊點都俾佢講埋。到西方旅遊觀光，佢無所不識，就算你有錢有時間，都冇辦法追得上飛機陳嘅飛行時間表。
左丁山問佢：「睇英超聯，以前車路士球衣上面有兩個字，就係FlyEmirates，現在阿仙奴新球場叫做EmiratesStadium，宣傳十足，點解你哋唔贊助一隊球隊，球衣上寫FlyCathay呀？」飛機陳為之苦笑，佢話：「𠵱家我哋日日為油公司打工，油公司日日進貢畀中東酋長，其中一位酋長日日揼錢畀Emirates。佢哋何止贊助英超球隊，英格蘭板球隊都係佢贊助嘅，國泰邊度有錢同人哋爭威風吖。」
飛機陳話收燃油附加費只能彌補額外成本（extracost）嘅四成，對利潤嘅幫助甚微，而當六月期油價去到七十三、七十四美元一桶時，根本冇法子對沖（hedging），故此雖然生意好唔錯，都做到死死吓，都係得個捱字。
既然「全球最佳航空公司2006」都唉聲嘆氣，其他航空公司嘅困難，可想而知。不談油價高昂，改談一啲輕鬆嘅，飛機陳有一隻新馬，今年十月到港，改乜嘢名好呢？遜哥警告佢不可用「機不可失」呢四個字，南天王陳濟棠遺恨廣州就係因為誤解「機不可失」呢句乩文也。時富關百豪已有一馬名「時機把握」，飛機陳不可重複；左丁山認為不如從俗啦，例如「飛機勇士」、「航機英雄」、「藍天猛將」、「振翅高飛」、「凌雲志」等等等，意思清楚，與航空事業有聯想，馬迷容易記得。如果飛機陳頑皮一啲（不過要幾大膽），可以叫隻馬做Spitfire（在「不列顛戰役」立下大功之噴火式戰鬥機）最適合短途快馬之用。中文譯名呢？如果冇記錯，好似係「吸血鬼」戰機！