家吓做賓卡除咗做嘢要醒，數要精之外，最緊要有一技之長。恒生就最好識打乒乓波又識唱吓歌，滙豐就要識打吓高球，中銀要識聽音樂睇畫，而渣打就梗係跑馬拉松啦，仲要愈高級就跑得愈快，咁先為之VeryGood！
渣打集團行政總裁MikeDeNoma（圖二），4月中旬參加喺非洲舉行、全程243公里，即係相等於5.5程馬拉松嘅MarathonDesSables，咁甘嘅賽程，少啲腳骨力都唔掂。
呢個賽事除咗距離長之外，仲要橫跨撒哈拉沙漠，日日氣溫都係42度以上，聽講阿Mike對腳起晒水泡，最終7日先跑完，喺731個參賽者中排244，成績算係唔錯囉！阿Mike話，日頭就係咁跑/行，晚黑就係咁睇同事同埋支持者嘅打氣電郵，咁先可以撐足全程，雖則係攞苦來辛，但真係好鬼滿足囉！