對意大利人來說，吃，是快樂不過的事情，胡杏兒日前到意大利親身體驗到意大利人的快樂文化。此行杏兒學做pizza、超級大牛排和homemade意大利粉，又跑到農莊耕田種菜，吃喝玩樂享受人生。只是，從小父母離異的她，在看到農莊一家五口為共敍天倫，而齊齊放棄城市高薪厚職，回歸簡樸的田園生活時，杏兒實在既感慨又羨慕。 撰文：戴彩煥
由意大利南部的托斯卡那省（Toscana）出發，胡杏兒足迹踏遍文藝復興發源地佛羅倫斯（Florence）、有美塔之城之稱的聖吉米納盧（SanGimignano）、被城牆包圍着的蒙塔列治安尼（Monteriggioni），以及米高安哲奴創作大衞像所用的大理石礦場卡拉拉（Carrara）等等。
眼前幕幕如圖畫的大自然美麗景致，令杏兒感受到前所未有的恬靜、悠閒，更難得的，是杏兒有機會學習意大利人吃的文化，例如，烹調1塊比正常人面部還要大、10多磅重的牛排，自製各種新奇口味的雪糕、pizza、爆榖和意大利式私房意粉醬，以及學做當地著名的牛肚包和homemade意大利粉等等，杏兒在追尋美食源流的同時體會到美食背後，享受人生的真意。
城市之家回歸農村
杏兒說：「意大利人真係好識得享受人生，食餐飯可以食幾個鐘，一到夜晚7點，成條街好似冇晒人咁，個個返晒屋企食飯，唔似得香港人，夜晚可能仲要留喺公司做嘢，大家生活節奏真係好唔同。」
在導遊安排下，杏兒探訪了意大利中部的農莊，認識了農莊的女主人Evana一家。杏兒說：「呢個意大利農莊住咗一家人，五口之家本來喺城市有自己事業，個仔係測量師，兩個女就係會計師同電腦工程師，因為媽媽Evana覺得子女經常加班應酬，大家忙得冇機會見面，所以提議搬到郊外共享天倫，呢個建議得到丈夫同仔女嘅支持，佢哋齊齊辭職，全家由城市搬嚟郊外住。」
在Evana帶領下，杏兒看到他們一家人合力種出來的番茄、薯仔、南瓜、黃瓜、士多啤梨、豆角和各式各樣的辣椒，愈看愈興奮，於是杏兒也捲起衣袖落田拔蘿蔔，親身體驗耕田樂。從未試過落田的杏兒，不但在田中雞手鴨腳，更險些跌在地上，可謂愈幫愈忙。她說：「見到咁多植物，我突然間諗，如果我老咗，退咗休之後，可以有自己嘅田種嘢出嚟食，然後又可以日日落田揀今日食乜餸，咁都幾開心，唔知我有冇咁嘅機會呢？」
童年不快自愛自強
杏兒8歲時父母離異，她與兩個姊姊本跟父親居住，後來父親娶了日本籍繼母，杏兒便於11歲時跟兩個姊姊到北愛爾蘭讀書，跟父母的關係十分疏離，因此，當晚飯時看見Evana一家人排排坐談笑風生的溫馨情景，杏兒實在既感慨又羨慕，她說：「好羨慕佢哋一家人咁融洽，真係發自內心嗰種好relax、好享受人生嘅感覺，我都好希望自己可以咁，唔好成日掛住做嘢，營營役役，根本你自己都冇時間去留意自己身邊發生乜嘢事、遇到啲乜嘢人，其實我希望我可以livemylife……雖然我嘅童年唔係好開心，但係我嘅經歷令我變strong！」
杏兒今次意大利之旅，將於逢星期一至五無綫《向世界出發》內播出。
