來到旺角覓食，一眼望去，滿街都是茶餐廳，油膩的燒味飯，光是聽到都無胃口。好在快富街一帶的店子最近悄悄搞「有營起義」，新推出一系列營養健康飲食，有新登場的韓國料理獨家炮製水果泡菜、人參沙律，亦有新派冰室打正旗號sell營養低卡乳酪飲品，還有店子讓牛油果這種「甘草」食材坐正做料理。試問身為MK型人的你，有咩理由唔食得有「營」先！
記者：梁雅芳
攝影：何家亮
模特兒：Abid&Lolly（TheGroup）
非主流帶價錢大眾化
快富街一帶咩最多？唔係食肆，而係Van仔。紅Van綠Van在身邊車輪轉，行路真係要眼觀八方。雖然呢頭人流無女人街嗰邊咁多，不過亦林立了不少食店，價錢大眾化，最適合鍾意捐窿捐罅同搵着數嘅小市民。
新登場韓國料理獨家水果泡菜
才於上個月新登場的金饍韓國料理，Kimchee是金饍的譯音，亦作泡菜解，打正旗號賣自家製的地道韓國泡菜，款式多達幾十種，冠絕全港，每日則會推出20款。其中獨家推出的人參沙律、水果泡菜等，光聽名字就知好健康，而低脂肪豚肉就算點BBQ都不覺肥膩。餐廳更遠道從韓國請來大師傅坐鎮，精心炮製出著名韓菜「雞一匹」，喺香港好難有得食。
水果泡菜
自家炮製嘅水果泡菜，香港其他地方都好難食到，最特別係有蘋果同埋風水梨泡菜，食落一啲都唔辣，仲有酸酸甜甜的水果味，最緊要係免費，着數到暈。
雞一匹湯鍋$280
無錯，的確係「雞一匹」唔係「馬一匹」，其實係指一隻雞。「雞一匹」在韓國賣到街知巷聞，原隻雞浸在雞湯鍋裏上枱，湯底夠晒雞香味，擦完仲可以將韓國烏冬倒落去煮，配搭泡菜一齊食。
人參野菜$120
呢款野菜沙律賣相吸引，原條人參一眼就見，無花無假，其他材料包括雪梨、番茄、青瓜、紫椰菜、紅椒、黃椒等，全部都係清新爽口的蔬果，低卡健康，啱晒鍾意keepfit嘅女仔。
肉類拼盤$260
一開始仲以為燒烤一定又肥又唔健康，但金饍的肉類拼盤燒烤卻零舍唔同，採用低脂肪豚肉，鍾意食肉又怕肥的女士們都唔使忍口。
1﹒金饍韓國料理（26280680）
新世紀廣場3樓363-366舖
樓上冰室營養學班底
營養冰室，聽落個名好懷舊，其實賣嘅係新興營養飲品。這間樓上cafe主打一系列乳酪飲品，添加了來自美國的秘製營養粉，而且保證無糖，全部用新鮮果汁調味，夠晒天然。cafe開業不過一個月，已俘虜不少旺角OL。6個合夥開店的Partner之中，有4個專門學過營養課程。店主之一的Karen說，秘製營養粉內已有齊A至Z的維他命、鈣質同鐵質，而且含有很高的植物蛋白，但保證無脂肪，每杯飲品都低於250卡路里，飲咗唔怕肥，精神好啲，皮膚又滑啲。
自選系列（呍呢拿底＋脫脂奶＋木瓜）$32
木瓜加奶最啱女士們喇，事關聽講有豐胸效果嘛。加上脫脂奶低卡，好受OL歡迎。
鮮果纖纖$28
想補充纖維，食呢杯鮮果纖纖就最啱。除秘製乳酪醬，還加脆卜卜的粟米片，最上面有一層新鮮水果，酸酸甜甜，食落好開胃。
茉莉花＋玫瑰花茶$42
透明玻璃杯裝住熱辣辣的花茶，幾瓣玫瑰漂浮茶面，嗒落芳香四溢。
2﹒營養冰室（23947686）
快富街39D建煌華廈1樓
台式口味140款飲品任擇
嚟緊夏天，消暑飲品多多都buy。歎過營養學派的健康飲料，轉試台式的。這裏有點茶餐廳feel，老闆蔡榮錕在台灣住過幾年，創業時便做台式飲食。單係台式飲品已多達140種，包括健康的抹茶系列。新引入小麥草加苜蓿芽汁，清肝防癌，大人細路都啱飲。
小麥草＋苜蓿芽汁$18
飲落完全無草腥味，口感好清新，一杯已經等於2公斤小麥草加苜蓿芽的濃縮，加上兩種材料都有防癌功效，新上市已經好受街坊歡迎。
bodyfit藍莓汁$33
呢款係一隻健康飲品，老闆話飲一杯已經可以補充一日所需的營養，最適合追求身形苗條的女士。飲落口感好creamy，似藍莓奶昔。
綠茶什果雞粒炒飯$28
炒飯加入綠茶粉一齊炒，有淡淡的綠色，綠茶本身不含熱量，可提升新陳代謝，燃燒脂肪，更有美白去斑、防癌等功效。飯裏面仲啖啖都係水果，酸甜開胃，夏天食飽肚而不覺滯。
3﹒仙果園台式餐廳（34223618）
花園街102號地下
新系列牛油果菜補充維他命
紅螞蟻成日都高朋滿座，哦，原來新近推出一系列牛油果菜式。要知道牛油果含有11種維他命、14種氨基酸以及蛋白質、鈣、鐵等，每千克發熱量是一般水果的2-3倍。推廣期到6月30號咋！
焗釀芝士鮮蟹肉牛油果$35
以為芝士配搭牛油果一定好漏，食落反而幾清甜，蟹肉同白菌一齊煮，再釀入剖開兩邊的牛油果中，正！
蜜糖豬柳牛油果焗日式鰻魚飯$65
飯內落足料，啖啖鰻魚肉。牛油果同蜜糖豬柳夾在一起食，中和了食肉的飽滯感。
4﹒紅螞蟻（23930001）
西洋菜南街220號地下
法國有機食品不含農藥
專賣有機品種的連鎖店，獨家發售法國的有機食品，標榜不含農藥、防腐劑同人造色素，高纖、高營養、低糖、低脂、低卡。幾十款健康食品，有湯、有榖麥片等，啱晒有營新生代。
有機高纖椰香朱古力榖麥片$58
一打開包裝已經有好香的榖麥味同朱古力味，加埋脫脂奶一齊食，好香口。成包100g都係345卡路里咋！
5﹒生命力專門店（29970333）
西洋菜南街156號地下
