對古天樂這個星戰迷來說，《星球大戰》（StarWars）系列大導演佐治魯卡斯（GeorgeLucas）是遙不可及的大人物，古仔希望將來有機會認識這位偶像，因為他有個夢想，就是希望拍1部4,000年後發生在中國的星戰電影，以血滴子大戰星球人。 撰文：陳月媚 攝影：陳志嵐
古天樂雖已35歲，但仍然保持着心內的童真，閒時在家，除喜歡玩電腦遊戲外，最近更迷上看漫畫，隨時隨地都在追看現時日本最潮漫畫家浦沢直樹的新作《20世紀少年》，古仔不但愛看，還有雄心壯志要與日本的著名漫畫社日本小學館合作出版漫畫書。
已與出版社接觸
日本小學館現時擁有池上遼一與浦沢直樹兩位漫畫大師的漫畫出版權，據悉古仔已初步接觸該出版社，計劃邀請其中1位名漫畫家合作出版有關中國星球大戰的漫畫書。古仔充滿憧憬說：「我係星球大戰迷，佐治魯卡斯更加係我嘅偶像，屋企亦都收藏咗好多星球大戰嘅公仔。有日我對住呢啲公仔時，忽發奇想，美國有《星球大戰》，中國點解唔可以有部咁嘅戲呢？我同啲志同道合嘅電影界朋友傾過，大家都認為有得搞，所以我就發起做呢件事。」
古仔首先是在香港請編劇撰寫有關中國4,000年後所發生的太空故事，再交由日本漫畫家繪製，成事後就會在日本、香港和內地出版，接着會在全球再發行英文版，吸納大批讀者後再計劃拍成電影。古仔說：「搞中國版嘅《星戰》漫畫書同電影，我相信需要較長時間籌備，因為等漫畫流行都需要時間，加上我哋要拍真人版《星球大戰》，籌備亦需要幾年時間。」
古仔這個計劃原來也不是在空口說白話，早前他曾經到新加坡觀看有關《星戰》的展覽，因緣際會下認識了一些投資商，他們對合作計劃很感興趣。
「有理想好過冇」
古仔興奮道：「𠵱家我已經搵咗游乃海同鍾繼昌兩位名編劇同我搞緊個古仔，我哋希望部戲富有中國特色，所以喺太空同外星人對打都係用中國武器，好似關刀同血滴子咁，其實呢部戲同美國嘅《星球大戰》電影完全唔同，我哋會有自己嘅創作天空，呢個係我哋中國人嘅產物。呢個計劃係我嘅理想，雖然呢刻我唔知成功機會有幾多，但如果呢個計劃將來可以同荷李活方面傾合作，吸取佢哋拍星戰片嘅經驗，當然係好事。雖然呢個諗法暫時只係個夢，但我好享受呢刻進行緊嘅過程，因為有理想追求總好過冇。」
