打從4月底開始至5月尾，有多套重頭電影接住上映，例如《冰河世紀2》、《黑社會2》，以及近日在公仔箱勁播預告片的《M:i:III》，咁多都係有數字跟尾的續集。理論上，未睇過前1、2集都可以照入場當一個獨立單元咁睇，之但係，前後作點都會有關連、伏線或鋪排，好似《M:i:III》裏面Luther同靚佬湯講咗句「Welcomeback,brother」，實情係佢哋第1集已經係拍檔，無睇過咪唔知囉！唔想睇到一頭霧水入場前最好溫定書，就算睇過都可以再翻煲，咁先至連戲，有時舊作仲會正過新作。
記者：招佩珊
M:i10年前靚佬樣必睇
唔係因為《M:i:III》上畫，都唔會諗起睇第1集已經係10年前嘅事，而食住套新戲上，最近翻出第1集特別版DVD，加多咗1、2集的製作特輯、廣告片、相片集同《M:i:III》預告片等。睇番10年前嘅伊頓，皮光肉滑英俊到暈。頭兩集淨係掛住講靚仔湯個角色有幾英有幾勁，完全無講佢身世係點？佢女友係邊個？新一集就會揭盅。除了靚佬湯之外，原來電腦奇才Luther由第1集開始就已經拍住伊頓，呢啲咪要睇番前兩集先知囉！
黑社會大D勁好戲
口痕友話《黑社會2》雖則血腥場面依然震撼，但始終唔及第1集，戲份集中喺Jimmy仔古天樂身上，但演技尚待磨練，張兆輝勁Cut成了可有可無的閒角；事實上，第1集值得追番，上集有影帝梁家輝做大D，與樂少任達華鬥餐死，兩個好戲之人走埋一齊，有對手自然有好戲，還有東莞仔以一件夢特嬌造型贏得大家讚賞；實情喺第2集佢繼續着夢特嬌，而佢大聲夾無準、一味嘈喧巴閉話要做辦事人嘅態度，原來係學已經死咗無喺今集出現嘅大D哥。
X-MEN靈鳥由正變邪
一如過去兩集，舊有角色如狼人、X博士、磁力王同暴風女神等繼續喺第3集出現，新片會加入Angel同Beast等新角色。
而本來在第2集已死嘅靈鳥博士，今次將會安排佢重生，但性格會變得亦正亦邪，之不過，明明第1集佢係正派，搞到成件事都幾複雜；加上今集唔叫《X-Men3》而改為《X-Men：TheLastStand》，據聞劇情講到基因生化學家發現治療生物突變嘅方法，令到各個變種特攻都想試變番做正常人喎，因此今集會係《變》系列最終回；所以睇完碟再入戲院就有個完美的結局。
《變種特攻》兩極爭霸
上映日期：5月25日
冰河世紀有比較更覺《冰2》好睇
若然未睇《冰河世紀2》，真係要睇第1集先，皆因有比較才知好與壞；同事M話上一集拍得又散又悶，朋友J話睇到瞓晒覺；相反，睇過《冰2》的人就讚多過彈，今集除保留上集角色如長毛象文輝、樹獺森仔同劍齒虎大阿哥之外，亦加入其他有趣配角，睇起來更熱鬧；新1集就講3位主角設法拯救所有享樂主義的動物們逃離水災之地，之但係點解佢哋咁Friend？原來係上集救咗個細路，所以有啲情節要睇過上集先至明。
《冰河世紀2》上映中
海神號遇險記攞獎沉船戲
後生一輩可能唔知原版《海神號遇險記》有幾勁，呢套片攝於1972年，主角有真赫曼同歐尼斯鮑寧等影帝級人馬，故事講述巨型郵輪海神號遇上巨浪而翻側，船員同乘客幾乎全部喪生，只有幾名倖存者要在郵輪下沉前，爬到船底逃生。當年影片票房大收，亦創災難片先河，攞過奧斯卡最佳視覺效果獎；呢套舊作電視亦經常翻播，可謂「英語殘片」，但想買碟，香港碟舖暫時都冇貨，要買就上網訂。
《海神號遇險記》上映日期：5月31日
訂購網址： http://global.yesasia.com/b5/PrdDept.aspx/code-w/
section-videos/pid-1003249414/
售賣點
DVDPro （23326326）
地址：旺角奶路臣街6E德發商場地庫B4舖