你個阿卓，成日叫我唔好再同Chris拗，點知你就喺呢度爆我手動冷氣恒溫，我……我……你……你唔鍾意可以唔坐。
哼！講真，你又好我好多咩，大熱天時行環保大道開窗唔開冷氣，搞到我成個口都係塵都算喇，問你點解，你就話唔鍾意開冷氣。扮環保呀？
你覺得自己部車後座同尾箱都擺滿嘢又會慳油啲咩？好似你個尾箱咁，冰箱、兩張沙灘椅、報紙檔咁大嘅太陽遮、浮床、氣泵、一大箱書、100合1汽車工具、兩對拖鞋……Sorry，查實你直接令車的負重增加，增加耗油量，你部係Turbo車，本身耗油量好高，廢氣排放更加唔使講，加上車廂雜物嘅負重，耗油會多出三分一，你真係好唔環保。你要知道，部車淨重1,000kg，輸出100匹，咁每增加100磅，理論上就會浪費5匹馬力，呢5匹足可推動兩部車嘅冷氣，你以為唔開冷氣開車就係環保鬥士呀，啱啱相反呀。
萬一有咩意外嗰陣，車入面嘅物件亂飛，好易會傷及自己同乘客，根據外國交通意外調查，好多車禍傷者都係被中控台嘅飾物或香精座打傷，你都係快啲去清吓你部車啲雜物，清完先同我講！
記者：鄭達基