「我記得買呢個電話時，係同成班friend一齊買，成班friend一齊用同一款手機好好玩，好多時可以互相傳嘢，呢部手機editfunction好強，我班friend最鍾意影相同加字，又或者無聊拍段短片，加埋配樂同歌詞，好好笑。仲有我都幾鍾意影風景相，影相功能就同相機一樣，有得自己調校，好好玩，平時拍劇等埋位有呢部咁多嘢玩嘅手機就最好不過。」
高鈞賢聽歌首選
「呢款電話一推出市面我就第一時間買咗，原因我之前用開嗰部SonyEricssonK750i唔見咗，呢款電話功能同唔見咗嗰部差唔多，咁我就即買。佢嘅賣點之一係有聽MP3功能，我本身係好鍾意音樂，所以除咗用嚟打電話外，用得最多就係聽歌，兼且電話有MemoryStickProDuo卡槽，可以同我部相機、PSP共用，非常方便。」
陳豪超薄啱袋
「我以前用開PDA電話，但因為太大部，有啲唔方便，呢部新款電話係卡片型，我好鍾意呢個超薄設計，體積又夠細，啱晒我着西裝時可以放喺恤衫袋，有一百三十萬像素同內置閃光燈，最緊要有藍芽功能，可以同朋友交換鈴聲。但唯一美中不足冇視像，但我好鍾意用Samsung手機，字幕夠大，鈴聲又夠響，一定唔會聽唔到，好啱老人家用，我買畀阿媽嘅手機都係呢個牌子。」
司徒瑞祈打機捉鼠
「呢部白色手提電話係朋友送畀我嘅生日禮物，因為事前我有講過想買部手機，而且佢又知我鍾意白色，所以佢就揀咗呢部送畀我。我最鍾意佢有每個人打嚟都唔同響聲嘅功能，而且佢內置嘅超音鼠遊戲好好玩，埋位前打機消磨時間。我買手機都係講求實用，總之接收OK，聽得夠大聲，同埋易用就已經合乎標準。」
採訪、攝影：駱華齡、卓寶花、楊潔雯、葉君海、陳偉權、馬建華、陳俊強
