不用等到母親節都知道，阿媽唔易做。有幾難做？難在工時長，薪水奀。慢着，乜阿媽有糧出咩？美國薪酬管理公司Salary.com訪問了四百名全職和上班媽媽，統計得出全職媽媽每周工時長達92小時，上班媽媽50小時，雖然看似比全職媽咪舒服，但實際上打兩份工，服侍兩個「老闆」，日夜操勞，超級捱得。調查指全職媽媽應得年薪104萬港元，上班媽媽只有66萬多點，似乎不公平。統計是按照十個跟母親有關連的職業的薪酬，包括管家、託兒所老師、廚師、電腦操作員、家務助理、司機、心理醫生、看更和CEO的時薪，換算到鐵人媽媽身上。薪酬直情大件夾抵食，絕對不「任志剛」。假如真的有老闆撐，這樣好使好用擺明underpaid而不會起飛腳的員工，絕對請得過。任志剛是否要落台九千次，見仁見智。全職媽媽頂起成頭家，沒有真金白銀落袋，依然任勞任怨，無論白貓黑貓做特首，都應該識做，減稅可以另議，向全港母親大派特區大紫荊章就不能拖到連任後。
全職阿媽是年薪百萬的打工皇后，說出來是博各位媽咪行家一粲而已，實況邊有咁好景。阿媽這份終身學習的長工照國際慣例，行無薪制，甚至要倒貼，「上工」前得儲夠彈藥，「入職」後冇得跳槽。獵頭公司唔會吼阿媽這類工種，師奶冇工會出頭，又不能歸邊做弱勢社群，半天吊，捱到職業病，卻從未見過阿媽向三十出頭的兒子追討賠償。這個母親節，商場食肆又試迫滿臉上略帶工傷愁容的慈母，閣下有無想過，每個月替你還卡數、勸膽固醇超標的你食少兩隻生蠔的母親，原本搵銀本事過你好多。