陳淑蘭日前拖新歡仁愛堂總理王政皓高調睇首映，豈料戀情峯迴路轉，王政皓前晚竟與向海嵐夜會唱K狂歡4小時，之後更打的護送伊人離開，令兩女的情敵關係浮上枱面。其實王政皓去年已曾向郭可盈埋身獻殷勤，短短10個月內連環冧掂3位港姐，足見王公子這位港姐殺手功架十足。
向海嵐前晚11時許與王政皓及1名女伴齊齊現身銅鑼灣1間卡拉OK，化淡妝的向海嵐滿臉笑意，步履輕鬆地一馬當先進場，而戴鴨舌帽及穿白T恤的王政皓則昂首邁步尾隨，胸肌紮實的他甚有風度地走到櫃位處先行登記，向海嵐則坐到一旁靜候對方辦手續，接着與對方開房唱K。
夜會狂歡4小時
王政皓和向海嵐唱K狂歡，一玩就是4個小時，至凌晨約4時兩人才唱夠本雙雙離場，結伴到街頭截的士，此時他們發現有記者在場，王政皓即時黑面，被踢爆跟蘭子爭寵的向海嵐則目光呆滯，唇膏甩色，滿面無奈地向鏡頭擠出牽強微笑。而的士離開後約10分鐘，王政皓獨自駕駛價值約190萬元的白色保時捷折返，之後再過了10多分鐘，他才與大班友人一起步出卡拉OK，並獨自取車離去。
其實王政皓上周二（2日）才偕現年36歲的陳淑蘭到灣仔出席《職業特工隊III》首映禮，其間蘭子揚言寂寞時會與對方發展，似暗示這段情正在萌芽。王政皓乃仁愛堂總理，任職父親王錦泉旗下集藝莊商品有限公司營業董事，家住九龍塘別墅，平日揸法拉利及保時捷等超級名車代步，派頭十足，原以為蘭子泊得好碼頭，沒想到戀情卻在短短數天內出現戲劇性變化，王政皓前晚竟夜會向海嵐唱K，難免令人覺得他一腳踏兩船。
其實王政皓早於去年7月已被踢爆與有夫之婦的郭可盈撐枱腳，在10個月內火速與3位港姐出身的女星展開單獨約會，王政皓堪稱新一代港姐連環殺手。
不過，向海嵐和陳淑蘭卻是爭得到未必好，因為繼前晚夜會向海嵐後，昨日王政皓又有新女陪滑水。昨傍晚約6時，王政皓與王賢誌及大班朋友在大潭滑水後，1名妙齡女伴本擬登上其法拉利跑車，但見有記者在場，該女郎即坐上王賢誌的座駕避風頭。記者上前問王政皓是否與向海嵐拍拖時，他答：「同佢完全唔係，噚晚係朋友聚會啫，大家架車咁啱泊喺跑馬地同一個停車場，咁夜，咪坐的士載佢攞車。」其後他又補充不抗拒與圈中人拍拖，一切隨緣。再問到王政皓與蘭子的關係時，他說：「10幾年朋友，識好耐啦。」
蘭子：kiss冇伸脷
另一方面，向海嵐昨日則在電話中說：「我喺郭可盈婚禮識王政皓，噚晚咁啱朋友約聚會先撞番，我早走要去攞車，佢咪搭的士車埋我。」問她可覺王政皓有追求之意？向海嵐斬釘截鐵說：「唔覺，我哋零發展機會，性格花弗嘅人唔符合我揀偶條件。」
對於王政皓連環𠝹港姐，蘭子昨日亦透過電話說：「佢係我寂寞發洩嘅朋友，不過我哋冇超出朋友關係，就算goodbyekiss都冇伸脷，好均真。」對於王政皓夜會向海嵐，蘭子說：「向海嵐係港姐冠軍，我點夠佢爭，我都好戥呢個男性朋友開心，佢咁有taste，噚晚約港姐，今晚咪約亞姐囉，希望佢採盡森林嘅花，我就嚐盡森林啲草。」
採訪、攝影：娛樂突發組、葉君海、何永寧、比華利
