古仔和杜琪峯先後合作《嚦咕嚦咕新年財》、《百年好合》、《柔道龍虎榜》和《黑社會》等電影，而他擔正演出的《黑社會以和為貴》正在上映，票房理想，其演出亦備受好評，難怪古仔認為杜琪峯是他的電影伯樂，古仔說：「阿杜係好嚴格嘅導演，佢喺片場好留意每個演員嘅特性，從而去畀每位演員盡量發揮佢嘅特質，所以好多演員喺佢手就會脫胎換骨。好老實，以前未拍阿杜嘅戲時，仲以為自己都識做戲，但拍過佢幾部戲之後，到呢部《以和為貴》差不多拍到中期，我先慢慢摸到演戲嘅竅門，但自己睇番部戲時，我覺得有啲場口仲可以做得再好啲。」
對於兩集《黑社會》均標榜揭露黑社會真實面，古仔認為：「其實幾貼近現實，以前好多年輕人覺得入黑社會好威，但呢代嘅年輕人反而好抗拒入黑社會，加入三合會係犯法嘅，加上入會後要畀會費外，仲要幫大佬去劈友，𠵱家嘅後生仔咁精靈，咁冇着數嘅事，啲後生仔仲點會有興趣加入？」
結識江湖朋友
古仔續說：「以前我所認識嘅黑社會真係幾恐怖，我身邊亦有江湖上嘅朋友，見佢哋成日要劈友，我覺得好辛苦，以前有江湖朋友亦叫過我入會，但我好怕去多人嘅地方，佢哋成日咁大班人去劈友或打架，每次都要見咁多唔識嘅人，好驚㗎！又無啦啦要定期畀會費，計過都係冇乜着數喎，梗係冇理佢啦！」