參加選美幾乎被認定為入娛樂圈，甚至嫁入豪門的最佳捷徑，所以每年港姐選美，總會吸引大班妙齡少女參加，希望藉此飛上枝頭，如昨日舉行的港姐首輪面試中，明星臉湧現，靚版薛凱琪、薄唇舒淇、翻版如花和肥花齊齊出現拗手瓜，究竟鹿死誰手，下周六第2輪面試自有分曉。
新一屆港姐面試昨日在將軍澳電視廣播城舉行，300位佳麗打扮得花枝招展，分別穿上低胸裝、吊帶背心甚至公主服上陣，務求博取評判好感，順利晉身下周六舉行的第2輪面試。
群星出動
昨日面試場面可謂星光熠熠，包括靚版薛凱琪、薄唇舒淇、黑超容祖兒、cute版王穎妤、少女版發嫂、女版夏韶聲、《功夫》中的翻版哨牙珍、翻版肥花和如花，總之燕瘦環肥樣樣齊。
不過，今年面試佳麗質素麻麻，除薄唇舒淇及任職產品模特兒的靚版薛凱琪較為標致外，其餘不是樣貌平庸，便是過於成熟，甚至冇身材冇樣貌者和外表看似「真的漢子」的佳麗也膽敢前來面試，認真勇氣可嘉。
公主撼牆
最搞笑的，是昨日頭戴小皇冠、貌似田雞（田啟文）的女子，面試前本是笑容滿面，信心十足，但面試後卻見她扁嘴離場；原來，小公主在評判面前做指定轉身動作時，不慎撼頭埋牆，由於在評判面前大出洋相，擔心影響評分，小公主才一臉失望離開。
此外，港姐統籌經理何麗全昨表示，今屆面試佳麗以大學畢業生居多，其中有5至6位為空姐，無綫會在昨日面試者中挑選40至50人參與第2輪複試，何麗全說：「第2輪複試後未必成為真正候選人，重要再經過4、5日集訓之後先至選出。狄娜主動同我哋聯絡，話想參與今屆選美活動，同班女仔傾吓偈，教吓佢哋談吐，7月中我哋會去韓國拍外景，Se7en會做嘉賓，Rain同李英愛重傾緊，至於比賽就會喺8月12日喺紅館舉行。」
採訪：卓寶花、卓美娟、王崇穎
攝影：陳偉權、陳慧安
