成屋有15隻貓、5隻狗，唔講仲以為係寵物店；屋企仲有間比寵物店大嘅貓屋。主人Rocky雖然讀緊寵物護理課程，但要照顧20隻百厭星又談何容易？貓狗天生水火不容，唔會打交嘅咩？肯定唔會，我話嘅！去到Rocky屋企，絕無臭氣熏天，大屋井井有條又有冷氣歎，做有錢人寵物喎，啲貓貓狗狗又點會打交吖？
記者：許維雅
攝影：何家亮
放假都唔捨得出街
4年前，Rocky開始養第1隻寵物，𠵱家，成屋有15隻貓5隻狗，嘩，點養呀？「未計日日開冷氣嘅電費，每月使費$5,000，天台裝修過2次，第一次起間貓屋，第二次為咗隻大狗荷蘭毛獅犬整咗間玻璃屋，心機同彈藥畀足100分。」鍾意狗定貓多啲？「差唔多！貓易打理，養大狗最煩，但狗熱情啲鍾意黐主人，同狗玩開心好多。」佢𠵱家讀緊寵物護理課程，喺獸醫診所已經日日對住貓貓狗狗，難得一啲都唔厭，「我放假都唔出街㗎，我好Enjoy留喺屋企同佢哋玩，對住佢哋真係可以好開心。」
唔知自己係狗
20隻貓狗一齊生活，竟然可以和平共處，有幾隻貓狗同時間長大，相處時間又耐，佢哋有時變得都唔知自己係貓定係狗。Rocky：「荷蘭毛獅犬Zorro就成日以為自己係貓，又唔知自己大隻又大力，仲成日走去同啲貓玩，嚇到啲貓死咁滯。佢𠵱家唔係幾識吠，就算吠都吠得好高音，畀手動靜都好似貓。論最惡，Orrie一定係大家姐，成日蝦蝦霸霸，明明自己有都要搶人哋啲嘢食。」
對短腳有癖好
人總會偏心，Rocky最錫短腳貓Coco同哥基犬Orrie，因為兩隻都係短腳品種：「我足足搵咗3年先搵到啱心水，短腳貓喺香港好難搵，短腳貓生BB都未必生到短腳品種，專業人士認為係基因突變先有短腳貓品種，所以價錢好飄忽，萬幾蚊至幾千蚊都有。後尾喺銅鑼灣寵物店見到Coco只係賣$4,000，諗都唔諗即買，我都唔知點解對短腳嘅寵物特別情有獨鍾，可能腳短感覺特別Cute，行起路上嚟啲動作變得特別好笑。」
主人教路
Rocky：「貓狗絕對可以和平共處，秘訣係公平。如果唔喺屋企，一定要收好晒啲玩具，唔收佢哋一定爭餐死，是但一隻爭唔到又喺度嘈，嘈起上嚟就打交㗎嘞。」
