𠵱家啲男人結咗婚通常都係親外母多啲，前晚賭王個仔何猷龍就陪住老婆羅秀茵同外母去數碼港睇湯告魯斯（TomCruise）嗰套新片《職業特工隊III》
（M：i：III），實行做半邊孝順仔。
由後門離開
小賭王嗰晚着住套西裝，何太就一身好輕便嘅衫褲，一行3人睇7點20分嗰場，佢哋應該係預先訂咗飛，話晒係賭王個仔，出入當然梗係做好保安措施，佢哋由兩位保鑣護送下去戲院，但保鑣就冇入到去睇戲。
當睇到9點半散場之後，再由保鑣好低調咁護送佢哋由後門離開，外母羅太就自己坐平治房車走人，小賭王夫婦坐黑色平治。
其實何猷龍夫婦前晚睇戲前，下午先喺跑馬地養和醫院出現過，何太腹部微凸，仲被懷疑有喜，當時佢兩公婆冇否認，如果何猷龍真係就嚟做老竇，佢哋去睇《職III》呢啲咁刺激嘅戲，唔通唔怕對孕婦同BB有影響咩？
Textby關仁
