劉嘉玲買醉避緋聞

劉嘉玲前晚喺台灣出席微風之夜嘅宣傳活動，有傳媒提到佢早排同胡軍入住同一間酒店而傳出緋聞，嘉玲即刻黑晒面。嘉玲喺活動後去咗喜來登酒店同朋友聚會，離開嗰陣仲由成身酒氣嘅朋友掩護上車，佢就不斷迴避記者嘅鏡頭。問台灣經理人陳寶旭前晚嘉玲係咪飲咗好多酒，經理人話呢啲係佢私人行程，點都唔肯透露。但見佢坐喺車嘅後座，幾乎瞓咗喺度咁滯，似乎真係飲咗唔少。