喺香港做議員唔單止俾人竊聽，就連人身安全都被威脅，好似長毛咁，近日就收到個SMS（手機短訊），叫佢喺「三天之內將三十萬元現金用報紙包好，投進柴灣巴士總站的垃圾桶，否則一切後果（下刪辱罵文字十數個）自負，不准報警，好之為止（編者按：應該係「好自為之」）。」長毛話，佢今日就會去灣仔警署報案，今次個短訊有晒來電顯示，呢個人甚至留埋全名同屋企電話，長毛好有信心差佬一定破到案。
余若薇：從未收過
呢個短訊唔淨止針對長毛，仲恐嚇埋陳日君樞機、李柱銘同余若薇，叫佢哋4個一齊存錢。不過睇嚟淨係得長毛收到呢個恐嚇短訊，因為長毛個手提電話已經變咗半條市民投訴熱線，其他3人嘅電話從來冇公開過，好似余若薇咁，佢噚日就忙緊開集思營，都唔知有乜嘢恐嚇短訊，佢同八方講：「從未收過呢啲恐嚇短訊，但呢啲嘢唔驚得咁多啦。」
長毛話，未做議員之前頂多係收吓fax，但當選之後，手機就收好多呢啲恐嚇短訊，佢都有打過電話畀發短訊嘅人，媽叉對方點解恐嚇佢，但呢啲縮頭烏龜就唔敢認。佢又話，呢啲無聊人以前就淨係恐嚇吓，唔知係咪佢近排鬧得多煲呔，今次加埋要勒索30萬，所以實在忍無可忍，一定要報警。
講番余若薇，佢做主席嘅公民黨噚日開集思營。湯家驊話，今次係講吓外面對個黨嘅定位有乜睇法，搵陸恭蕙同陳祖為做啲分析演講，同埋準備吓未來選舉。陸恭蕙就講中港關係，睇怕公民黨仲度緊究竟應該點樣同中央溝通。
爆料熱線：29290000、27860099
報料傳真：26239278
報料電郵：[email protected]