行街鄭講完收養子女及連帶問題之後，講番佢老本行，賣廣告，佢話OOH媒體（outofhomemedia）甚為盛行，因傳統標板廣告（billboard）以前甚為呆板，但現在有晒LCD，標板可以互動、活動性強，吸引行人眼睛，收視率大大提高；客戶比以前樂於使用。傳統媒體如報紙雜誌當然不斷受到威脅啦，行街鄭認為在寬頻上網時代，報紙新聞難以鬥快，譬如即使冇電視直播，每日香港下午時間，已經可以上網睇到NBA季後賽嘅結果，附詳細報道，NBA.com與CNNSI.com寫得好精彩㖭。報紙要第二朝先至講比賽結果，如無優異記述評論文章陪襯，邊度有競爭力呀。
報紙銷量下跌，係長期趨勢，無可挽回，所以美國報紙愈來愈重視附屬網站，爭取名家寫專論專欄，但短期而言，見步行步啦，冇乜好計。行街鄭話廣告行人人都知嘅數字，根據AsianBusinessReadershipSurvey（ABRS），《蘋果日報》仍然維持優勢，但減少咗。二○○一年十月，Media&Marketing，提過ABRS嘅數字，《蘋果》在商界讀者（行政人員）之中，閱讀《蘋果》嘅比率有49%，《南華早報》有47%，《經濟》35%，《明報》、《信報》各佔22%。
四年多以後，行街鄭自廣告公司得到嘅ABRS最新資料，《蘋果》佔有率跌咗，去到46%，但原來人人都跌，《南早》佔45%、《經濟》30%、《明報》21%，係得《信報》微升至23%。行街鄭認為免費報紙唔會影響到商界行政人員。《蘋果》、《南早》等等流失商界讀者，可能與寬頻上網有關，行政人員上完網，未必再睇報紙，而報紙亦應檢討自己是否與時並進，是否有進步，是否貼近行政人員需要，例如《蘋果》嘅商界讀者佔有率跌咗三個百分點，雖然都係第一名，似乎要諗吓邊一方面「趕客」噃。行政人員聖經──《金融時報》嘅基本新聞結構係告訴讀者howtomakeit，howtoinvestit，howtospendit，要做得到呢三樣兼夾高檔，真係好難。