「呢部相機雖然唔係最新款，但係都跟咗我唔少日子，因為貪佢細細部，螢幕又夠大，最重要係影出嚟啲相好sharp，影得我靚啲同瘦啲。每次做嘢前我都會自拍，因為可以睇吓個妝上鏡有冇問題，我又會用佢嘅video功能錄低自己嘅演出，睇吓自己做成點，有乜錯漏可以即刻糾正啦。」
唐詩詠必備孖寶
「我一向好鍾意淺色嘅嘢，呢部電話就啱晒喇，仲有埋雷射印花，又夠細部，啱晒女仔用。你唔好睇佢130萬像素相機好似唔多夠呀，其實啲相都好靚㗎。同埋我之前恨咗買iPod好耐㗎喇，不過後來iPodNano出咗我先買，𠵱家出街真係必備㗎。」
戴夢夢過導演癮
「我至鍾意呢部機，貪佢螢幕夠晒大，又夠薄，加埋佢嘅粉藍色，好靚喎。同埋部機最好嘅function係可以拍無限長嘅短片，我見馮德倫同吳彥祖佢哋拍短片拍到做導演，我咪又周圍拍，扮吓攝影師囉。不過最常用都係開工用嚟影相，影低晒唔同嘅造型。」
陳苑淇水晶DIY
「我之前用開Nokia電話，但就唔見咗成6、7部，呢部電話係爸爸送嘅，我特登去搵黐水晶甲嘅舖頭幫我喺電話上面黐個J字（代表Jolin），冇咁齋，與別不同又獨一無二，間舖頭仲唔收我錢。呢部電話有埋PDA功能，可以入好多歌，最好就係可以scan啲名片入去，㩒吓部電話就搵到，唔使帶晒啲人嘅卡片喺身。」
採訪、攝影：李珮洳、藍文浩、駱華齡、陳偉權、何永寧
