MTV亞洲音樂大獎噚晚喺泰國曼谷舉行，除咗有台灣歌手王力宏擔任司儀，台灣嘅代表仲有蔡依林，而韓國方面就有人氣拍得住阿Rain嘅SE7EN，嚟自東道主泰國嘅TataYoung前日就以一身紅色打扮出席記者會，散發健康性感嘅氣息。
記者會當中最矚目嘅就係會同韓星安七炫組新組合嘅吳建豪，佢哋兩個仲齊齊以簡約嘅白色西裝赴會，真係襯到絕，睇嚟已經開始為組合舖路。
Twins擊敗劉德華
而Twins噚日亦去咗泰國出席頒獎禮，蔡卓妍（阿Sa）同鍾欣桐（阿嬌）一到機場，就有大概30個泰籍fans嚟接機，仲即時向偶像送花環同公仔，鬼咁熱情，而Twins今次仲擊敗劉德華獲大會頒發香港最受歡迎歌手獎。