在星級化妝師Zing的妙手下，看到的不只是巨星的美顏絕色，還有藝術創意。入行17年，Zing近年嘗試寫專欄和出書，作跨媒體創作，他除了得到和諧的美學觸覺，還學到守規矩、不越位的最高學問。 撰文：梁錦雯
來自新加坡的星級化妝師Zing，能夠在王菲臉上創作卡通眼，於鄭秀文（Sammi）臉上畫條Nike眉，還可以在劉嘉玲和舒淇臉上，掃出種種賞心悅目的色相，這一切統統肯定了Zing的手藝和創意。
表達私心與創意
當眾人驚歎Zing在視覺上創造力，其實他亦樂意推崇以靚為主的妝容：「平時做工作，我好開心同樂意咁做，幫啲客、廣告商、藝人得到佢哋要嘅嘢，正正經經，規規矩矩，令到佢哋嘅產品可以賣得更多，整件事係好靚，亦都唔會以自己為出發點，塞自己嘅嘢入去。好似Sammi拍護膚品廣告、Kelly（陳慧琳）出席場合，佢哋一定要靚。Kelly係世青，觀眾唔要睇Kelly古靈精怪，我唔會喺唔啱場合做啲唔應該嘅嘢。」
當然創造力亦是Zing從事化妝行業17年的根基，他說：「近幾年我好開心，幸運地可以有自己嘅平台，寫專欄甚至出書，得到平衡，可以將自己嘅私心同創意表達出來，係好有趣嘅事，同讀者分享精采嘅視覺滿足，滿足到自己之餘，又唔會互相越位。」
「我唔係拉人衫尾」
Zing近年還嘗試挑戰美術指導的工作，他說：「呢行成功嘅人，唔可以專攻某樣嘢，就算化妝技巧再好，亦只不過係合格嘅化妝師，唔會係揸大旗嗰個。好嘅化妝師係要對社會有觸覺，對時裝有觸覺，要了解攝影、燈光，美術指導，要做到統一嘅角色，一啲都唔容易。」
作為成功藝人的幕後英雄，Zing會否介意常常被傳媒給他冠以「王菲御用化妝師」7個字長稱號？他毫不介意地說：「呢個係事實，我唔係拉人衫尾，亦都唔會博宣傳，點解王菲要搵我化妝？自己知自己有斤両，Zing係有自己嘅本事，我唔係藝人，亦諒解佢哋用嘅字眼，只係想令讀者易啲明白，所以亦冇得我介意。」其實Zing去年出的《ZingbyZing》影集便由王菲寫序，可見他與王菲既是工作夥伴，亦是好友。
開班授徒傳秘技
入行逾17年，Zing最想開化妝學校，並以自己的名字推出化妝品，他說：「𠵱家得到Zing嘅人係一小撮嘅藝人，我希望多啲人得到Zing，甚至可以買嚿Zing返屋企。市面上好多化妝學校，但係我一做，一定肯定做最好，希望佢哋學到紮實、嚴謹，因為我做嘢有創意、執着同有時裝觸覺，我先至有今日嘅成就。」
Zing為事業捱出頭，其瘦削身形反映了他衝刺付出的代價，他揚言要多愛自己身體，令家人少一點憂慮，正如他的親密戰友王菲亦曾勸他：「你唔搞好自己身體，點喺事業上衝刺？」阿Zing則唱反調：「我𠵱家喺事業上衝刺完，先考慮照顧自己嘅身體。」
攝影：葉君海
場地：蘭桂坊酒店（九如坊）
部份圖片由Zing提供
