陳慧琳平日工作忙碌，閒時喜歡在家中看電視消遣，由《大長今》、《金枝慾孽》到現正播放的《火舞黃沙》都沒錯過，絕對是煲劇妹一名。而圈中不少藝人也是《火》劇擁躉。
陳慧琳：
我好鍾意蔡少芬嘅角色焦玉，𠵱家劇情講佢開始變奸，相信下個禮拜佢會仲奸啲，我好想睇佢奸到淋漓盡致個樣，佢都好好戲，演得好好，我不嬲幾鍾意佢㗎。其實我係因為好鍾意《金枝慾孽》，所以先想睇埋《火舞黃沙》，林保怡做孫白颺時好斯文，今次做閻萬曦就好粗魯好惡，我都會留意吓佢今次做成點，邵美琪我都鍾意㗎，但𠵱家未演到佢哋啲戲囉。
向海嵐：
我晚晚都追睇《火舞黃沙》，暫時我覺得Ada（蔡少芬）飾演嘅宋家女當家焦玉角色好突出，Ada以前都係演一啲爽朗人物，但呢次佢扮具威嚴嘅女當家，擔起大權，佢發揮得好好。男角方面，我覺得陳豪首集被點天燈一幕好搶，呢套劇題材都係爭權，好吸引，實景又靚，加上調到個tone好黃色，有另一番味道。
薛家燕：
呢個劇大部份係《金枝慾孽》班底，一早都知好吸引，但呢次新加入咗Ada同邵美琪，佢哋兩個都演得好出色。男演員方面，陳豪本身外形都已經夠粗豪，演起嚟就梗係淋漓盡致。我好欣賞呢套劇去到銀川拍攝，場面好宏偉壯觀，演員個個表現都好，真係完全冇冷場。
採訪：蔡如玉、比華利