法國總叫人又愛又恨，有人沉迷LV、有人沉迷法式浪漫、有人沉迷她的藝術文化。可惜每次去完歐洲旅行回來，總有一點遺憾，不是受不禮貌對待，就是被小偷光顧，永遠都為美妙旅程留下一點陰影。你以為LV就是法國國寶？到底甚麼才是法國最好？這個5月，且聽法國迷精選法式5件事。
記者：許維雅
攝影：何家亮、陳盛臣、譚盈傑
時裝「法國人唔追名牌㗎！」
法國時裝世界級名牌多不勝數，不少名人都拜到其石榴裙下。街頭上法國人的打扮都給人悅目的感覺，永遠有着自己的Icon，但被訪者一致認為：法國人追名牌的其實不多，他們取勝之處只是會令周遭的人迷戀。
Simon（頂好眼鏡老闆、法國居民、法港兩邊走）：「我好欣賞法國嘅設計師，佢哋嘅創作變化好大，經常令我有驚喜。最鍾意嘅牌子係Hermes，Hermes啲Design夠低調，好啱我！同埋最好就係出嘅數量唔多，鍾意佢嘅人要排WaitingList等佢，扮嘢！但係我鍾意，哈哈！而男裝方面，DiorHomme同JohnGalliano都係我到法國必買嘅牌子，LV就實在太濫喇！」
法式朱古力「難忘LaMaisonduChocolat！」
Jacky：「LaMaisonduChocolat完全將其他朱古力比下去，好多朱古力都係用植物油做，但LaMaison嘅朱古力真係用可可油做，味道香濃到冇得頂。」
Mavis：「每次出Trip睇完FashionShow返香港，我都一定會去LaMaison買手信。好味程度喺香港一定搵唔到。」
藝術「唔守規矩做就爆棚創意！」
Mavis：「法國母公司經常會帶我去一啲畫廊、展覽館參觀。Artist中我好欣賞PierreMarie同JohnPerello，PierreMarie嘅作品永遠可以帶給人歡樂嘅氣氛，而John就好有自己獨特嘅個性，法國藝術家令我明白佢哋嘅執着一定有佢哋嘅理由。」
Jacky：「我喺法國國立美術學院修讀FineArt，法國人嘅藝術創意，唔多唔少都因為佢哋感情豐富、Undiscipline（不守紀律）嘅性格有關。我記得第一日上法國文學，法國人都形容自己係唔守紀律嘅民族，正因為咁，佢哋可以有無限嘅創作空間。」
法式麵包「食極唔會悶」
CP：「讀書時冇乜錢，如今法國麵包最令我懷念。法國師傅會按照個人喜好做出唔同嘅特色麵包，間間都唔同。以前喺街頭巷尾嘅麵包小店都可以買到法國長麵包Baguette食，朝朝新鮮出爐，入口塊皮脆卜卜，包心暖笠笠軟綿綿，真係好食到不得了。」
Mavis：「我係一級麵包癡，去到法國，我一定會去Poilane買麵包食，我寧願食法國麵包都唔食正餐。有一次去到Poilane見到一個個大麵包放喺架度，好開心咁衝埋去睇，點知原來係咕𠱸，但見到咁得意，亦第一時間買咗。」
文化「《異鄉人》《小王子》夠經典！」
Jacky：「我喺法國經常睇書，但睇勻咁多本，最鍾意都係經典《異鄉人》。本書入面寫嘅嘢一啲都唔深，令我感受到簡簡單單嘅字句都可以令人啟發好深，得獎作品都唔一定好難明嘅！」
Louise：「我自己雖然識講法文，但睇就麻麻哋，最鍾意《小王子》呢本經典故事書。我自己第一次係睇中文，後來再睇多次英文版都覺得好好睇，𠵱家買咗本法文版收藏，希望盡我努力睇多次法文版。」
無法愛上的兩件事
一）法文唔好當你無到
好多人去完法國都鬧法國人態度惡劣，因為佢哋心直口快嘅性格，經常令人難堪，Sales態度差更係世界聞名。
Mavis：「我經常要同法國人接觸，自己法文又唔叻，成日都溝通唔到，佢哋好多時一聽見你講英文，啲面口就好難睇。好彩我母公司啲職員大部份都識講英文。」
Louis：「我自己諗住去法國都係學法文，講得唔係太叻，試過喺麵包店度被佢哋笑，對於一個LanguageLearner嚟講好大打擊。」
二）治安奇差地方污糟
Simon：「法國治安問題係好嚴重，睇邊區啦，我盡量都唔會去啲貧民區，如果有細路仔行埋嚟，我都會大聲叫佢行開㗎！」
Lily：「我最唔鍾意巴黎嘅地方係治安差之餘，周圍都係狗屎，好污糟，雖然我好嚮往響巴黎周圍行嘅感覺，但好多時我都會揀地方去。」